- Publika iha: 20 Janeiro 2025
Universidade Katólika Timorense (UCT) no Universidade da Paz (UNPAZ) realiza ona klase internasionál iha Timor-Leste.

Koordenadór Klase Internasionál iha Universidade da Paz Virgílio Casnive dehan, klase internasionál ne'ebé realiza iha UCT no UNPAZ ne'e hahú iha ona iha dia 16 de Dezembru tinan 2024 ne'e ho totál estudante hamutuk 79.
"Dadaun ne'e Universidade Katólika Timorense (UCT) no Universidade da Paz (UNPAZ) realiza ona klase internasionál ho estudante sira husi Índia no dadaun ne'e prosesu aprendizajen la'o ona iha Timor-Leste," nia dehan.
Nia dehan, estudante klase internasionál husi Índia ne’ebé hala'o prosesu aprendizajen ne'e iha Universidade Katólika Timorense (UCT) na’in 47 no iha Universidade da Paz (UNPAZ) hamutuk 32.
Nia dehan, sei iha etapa tuir mai iha fulan Fevereiru estudante husi klase internasionál hamutuk 700 sei mai tan tuir prosesu aprendizajen iha UCT no UNPAZ.
“Ida-ne’e pasu ida ne’ebé di’ak tebes ba edukasaun nian, tanba hahú ona klase internasionál oinsá estudante rai seluk mai aprende no adapta iha ita rain. Nune’e mós ita-nia estudante ba aprende iha ema nia rain. Ida-ne’e importante tebes no presiza kontinua programa ida-ne’e iha universidade seluk,” nia hatete.
Nia dehan, durante akompañia iha saladeaula ne’e estudante iha klase internasionál ne’e di’ak ona maibé dezafiu ida mak sira sempre tarde.
“Sira mai tanba hahan mak to’o tarde uituan. Tanba sira hela iha asrama Fatuhada nian no bus ida mak ba lori sira hahú oras 9h00, no oras 10h00 hahú prosesu aprendizajen to’o oras 16h00,” nia dehan.
Entretantu Reitór Universidade da Paz (UNPAZ), Adolmando Soares Amaral, dehan, estudante ba klase internasionál ne'e tuir orientasaun iha Índia no dadaun ne'e hahú ona prosessu aprendizajen iha UNPAZ.
"Kona-ba kooperasaun loke klase internasionál ne'e ami enkontru ona ho Ministru Ensinu Superiór no estudante sira halo hela orientasaun iha Índia, no dadaun ne'e sira-nia prosesu aprendizajen la'o ona," Reitór UNPAZ Amaral hatete.
Nia dehan, klase internasionál ne'e ne'e sei kontinua, tanba nia impaktu pozitivu tebes ba dezenvoliventu edukasaun iha Timor-Leste liu-liu iha nivel ensinu superiór.