- Publika iha: 08 Setembro 2011
Tuir Sekretariu Jeral Sindikatu Profesores Timor-leste (SPTL) Francisco Fernandes katak laiha profesores ida mak abandona formasaun maibe sira ladun ativu deit tanba balun antes ne’e tuir ona formasaun hanesan.
“Hau hanoin laiha profesores ida mak abandona fomrasaun, maibe sira ne’ebe la partisipa mak sira ne’ebe antes ne’e sai ona formador e sira kontinua duni maibe ho kontiudu ne’ebe hanesan e sira sente laiha mudansa,entaun sira para tiha,”hateten Sekjer SPTL, Francisco Fernandes,semana kotuk iha Motael Dili.
Farncisco hatutan tan profesores ne’ebe kategoria ba rezimi transitoriu mak iha obrigasaun atu tuir formasaun, maibe ministeriu rasik seidauk indentifika lista husi profesores sira ne’e.
“Realidade lista naran ne’e seidauk identifika se mak tama iha rezimi tranzitoriu no permanente, tanba ne’e mak ami dehan formasaun ne’e la klaru no latuir prosedur tamba formasaun ne’e rasik atu kapasita profesores sira ka atu fasilita deit konesimentu profesores sira kona-ba lian Portugues,” Francisco konfuzaun.
Tuir nia, dalan sustentavel ba formasaun ne’e mak tenke kontiudu bazeia ba orario diaria Profesores sira, no presiza mos fo fatin ba profesores atu aprende direitamente pedagoji no treinador sira mos tenki ho nivel edukasaun duni.
Entertantu treinador ba formasaun Maria de Jesus Maia hatete maske formasaun ne’e paradu duni loron tolu tamba ezigensia husi sindikatu profesor konaba kestaun rezimi kareira, maibe oras ne’e formasaun ne’e lao normal.
“Profesores sira durante ne’e partisipa ho diak tantu profesores la’os husi kapital, maibe husi mos distritu partisipa hotu,” nia katak
Honorina dos Santos Piedade ne’ebe antes sai treinador maibe oras ne’e nu’udar partisipante hatete durante ne’e nia sai hanesan treinador tamba Ministeriu Edukasaun rasik mak autoriza no atu sai fali partisipante mos depende ba desizaun ministeriu nian.
“Ha’u sempre kontente atu sai treinador ka partisipante tanba ne’e hanesan ha’u nia kna’ar loron – loron nian,” nia dehan.