Quarta, Fevereiro 19, 2025

Uniaun Europeia (EU) apoiu estudante na’in-haat (4) husi Universidade da Paz (UNPAZ) ba hala'o estudu komparativu kona-ba kurríkulu durante fulan neen (6) iha Alemaña.

Uniaun Europeia (EU) apoiu estudante na’in-haat (4) husi Universidade da Paz (UNPAZ) ba hala'o estudu komparativu kona-ba kurríkulu durante fulan neen (6) iha Alemaña.

Embaxadór Uniaun Europeia Marc Fiedrich dehan, Uniaun Europeia liuhusi programa European Region Action Scheme for the Mobility of University Student ( ERASMUS) hodi hasa'e asesu ba ensinu superiór iha nasaun parseiru sira liuhusi apoiu finansiamentu bolsu estudu nian.

Nia dehan, programa ERASMUS ne'e hanesan parte ida husi estratéjia foun husi Uniaun Europeia nian ne’ebé lansa iha tinan Rihun rua-rua-nulu-resin-ida (2021) ho naran globál gat-eway, estratéjia foun ida atu hasa'e ligasaun sira matenek (smart), moos ( Claen) iha setór enerjia dijitál no transporte no atu hametin sistema saúde, edukasaun no peskiza iha mundu tomak.

"Liuhusi programa European Region Action Scheme for the Mobility of University Student ( ERASMUS) ne'e ohin Uniaun Europeia apoiu tan estudante Timoroan na’in-haat (4) husi Universidade da Paz (UNPAZ) hodi ba hala'o estudu komparativu durante fulan neen (6) iha Alemaña," nia dehan.

Nia dehan, bainhira estuda iha Europa liuhusi programa ERASMUS la'ós de'it atu hadia sira-nia kualifikasaun akadémika, maibé mós sei asesu ba fasilidade sira klase mundiál nian.

"Ha'u apresia tebes ba Universidade da Paz ne'ebé ativa tebes iha programa ERASMUS ne'e no sai universidade privada iha Timor-Leste ne'ebé koopera ho Universidade Europeia nian balun iha programa ERASMUS," nia salienta.

Enkuantu nia dehan, tuir dadus estudante Timoroan ne'ebé sai ona benefisiáriu ba programa ERASMUS hamutuk hitunulu resin rua (72).

“Ha’u enkoraja universidade hotu iha Timor-Leste atu estabelese rede ho universidade sira husi Uniaun Europeia nian no sai benefisiáriu ba programa ERASMUS,” nia hatutan.

Entretantu Visereitór Asuntu Akadémiku Universidade da Paz (UNPAZ) Joaninho Xavier Hei dehan, UNPAZ hetan apoiu husi Uniaun Europeia ne'e liuhusi premiu ne'ebé mak UNPAZ hetan husi Uniaun Europeia.

"Ohin Uniaun Europeia liuhusi programa European Region Action Scheme for the Mobility of University Student (ERASMUS) apoiu tan estudante na’in-haat (4) hodi ba hala'o estudu komparativu iha Alemaña," nia hatete.

Nia dehan, estudu komparativu ne'e iha área rua kona-ba estudu ba paz no relasaun internasionál, espera katak fila mai bele lori benefisiu di'ak ba sira-nia an no universidade.

Aleinde ne'e nia rekorda, iha tinan kotuk mós liuhusi programa ERASMUS mós apoiu ona estudante na’in-haat (4) ba hala'o estudu komparativu iha Alemaña.

Iha fatin hanesan estudante benefisiáriu Darla Magno dehan, agradese tebes, tanba bele sai ona benefisiária ba programa ERASMUS nian hodi ba hala'o estudu komparativu iha Alemaña.

"Liuhusi programa ne'e ha’u bele aprende siénsia husi nasaun seluk, ambiente eskola no oinsá sira-nia hanorin," nia dehan.

Nia dehan, agradese mós ba Universidade da Paz (UNPAZ) tanba bele hili ona nia sai benefisiária ba programa refere.