Quarta, Fevereiro 19, 2025

Diretór Ensinu Sekundária Jerál (ESJ) 5 de Maio Becora, Casmiro Dias Marques hatete, Ministériu Edukasaun (ME) tenke aselera lalais uniforme eskolár. Tanba to'o agora estudante ba anu letivu foun ne'e la iha uniformidade.

Diretór Ensinu Sekundária Jerál (ESJ) 5 de Maio Becora, Casmiro Dias Marques hatete, Ministériu Edukasaun (ME) tenke aselera lalais uniforme eskolár. Tanba to'o agora estudante ba anu letivu foun ne'e la iha uniformidade.

Nia hatete, MEtanba tenke aslera lalais atu nune’e iha tinan letivu foun 2025 estudante iha territóriu laran bele utiliza ona uniforme nasionál.

"Uniforme eskolár ne'e to'o agora ita seidauk produz, tanba desizaun husi Ministériu Edukasaun katak labele produz ka haruka estudante sira suku lai farda foun hodi hein desizaun foun husi Governu ba modelu farda ida de'it ba eskola sira iha teritóriu tomak.

Ami la haruka estudante foun sira suku farda ne'e maske kleur loos ona entaun ita husu ba Ministériu Edukasaun atu aselera lalais ona, tanba estudante foun sira to'o agora la iha uniforme," dehan diretór Marques.

Nia informa, eskola sira ejizi atu aselera uniforme eskolár, tanba atu tama fali tan ona ba anu letivu foun, maibé estudante foun sira nafatin ho faru mutin no kalsa metan entaun ketak loos ho estudante tuan sira.

"Ita hein desizaun husi ME mak foin bele, maibé to'o agora ita hein no tama ona ba anu letivu foun mós ita-nia oan sira nafatin mai ho faru mutin no kalsa metan, entaun sira ketak loos ho estudante tuan sira ne'ebé iha nanis ona farda molok ME hasai sirkular," nia hatete.

Iha fatin seluk Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hateten, uniforme eskolár sei hahú implementa iha tinan 2025.

Nia dehan, uniforme eskolár ne'e hein implementa de'it ona, tanba nia prosesu loos hotu ona no hein publika iha Jornál Repúblika.

"Kona-ba uniforme eskolár ne'e hein publika iha Jornál da Repúblika no ita garante estudante sira bele utiliza iha tinan oin, maibé kona-ba nia kór ne'e, simples hela mutin-metan no kona-ba nia modelu ita hein iha Jornál Repúblika," dehan Sekretáriu Estadu Ensinu Sekundáriu Jerál no Tékniku Vokasionál Lemos.

Nia hatutan, kona-ba uniforme eskolár, tuir sirkulár Ministériu Edukasaun nian fó-sai katak nia mekanizmu no regra sira-ne'e sei sai husi diploma ida, iha artigu 14, bazéa ba dekretu-lei númeru 32, 33, 34, ho rejime jurídiku sistema nasionál edukativu nian.

"Ida-ne'e tenke ho nia diploma ministeriál ida liu-liu ba mekanizmu uzu, modelu, kór no kustu, atu nune'e labele prejudika tan inan-aman sira," nia informa.