- Publika iha: 20 Dezembro 2024
Hahú tinan 2024 Servisu Edukasaun Munisípiu Díli, la simu ona estudante sira ne'ebé transferénsia husi munisípiu seluk atu mai kontinua sira-nia estudu iha Díli, tanbá liga ho númeru estudante ne'ebé mak aas tebes iha Díli.

Xefe Departamentu Ensinu iha Edukasaun Munisípiu Díli, António Pereira Ximenes, hatete, ba oin sira limita atu simu estudante husi munisípiu sira, tanba dadus hatudu katak estudante iha Díli númeru aas.
"Númeru rásiu estudante iha munisípiu Díli ne'e aas tebes entaun ita mós limita ona atu simu estudante foun husi munisípiu seluk," nia hatete.
Nia dehan, Servísu Edukasaun Munisípiu Díli orienta eskola sira atu la simu direitamente estudante husi munisípiu seluk sein koñesimentu husi servisu edukasaun munisípiu Díli.
Nia dehan, bainhira simu tenke konfirma espasu iha duni ona mak bele rekomenda atu simu, maibé tenke ho razaun balun ne'ebé nia mai eskola iha Díli.
"Nune'e ita bele kontrola númeru estudante iha munisípiu Díli, sira mai Díli ne'e mós ita sei haree ba razaun fundamental saida, karik inan-aman servisu iha ne'e hotu, maibé ne'e mós razaun tenke klaru, maibé inan-aman iha munisípiu mak titip nia oan mai eskola iha Díli ne'e iha la simu," nia saliente.
Nia informa, bainhira eskola balun ne'ebé mak simu estudante sira husi munisípiu seluk seín koñesimentu husi servisu edukasaun munisípiu Díli, mak sei fó karta xamada.
"Dadus sei tama mai iha edukasaun munisípiu Díli, nune'e ikus mak ita identifika eskola sira simu transferénsia estudante husi munisípiu seluk mak ita halo xamada ba diretór eskola bazeia ba orientasaun ne'ebé ita fó hatene antes ona. Tanba transferénsia ne'e kompeténsia husi servisu edukasaun munisípiu nian la'ós eskola sira," nia dehan.
Entretantu Koordenador Rede Edukasaun Timor-Leste Coalition for Education (TLCE) José Montério dehan, desizaun Servísu Edukasaun Munisípiu Díli nian ne'e razoavel tebes no TLCE apoiu, atu estudante sira bele mantein no kontinua estudu iha eskola sekundáriu sira iha munisípiu rasik no lapersiza mai Díli.
"Estudante sira iha munisípiu ne'ebé atu kontinua estudu iha Sekundáriu lapersiza mai iha Díli, maibé iha munisípiu rasik ita apoiu desizaun ida-ne'e, tanbá liga ho ekonomia uma-laran nian," nia hatete.
Nia dehan, Servísu Edukasaun Munisípiu Díli mós tenke kontrola eskola sira atu labele simu estudante foun sira husi munisípiu karik sira simu tenke fó sansaun.