- Publika iha: 20 Dezembro 2024
Koordenador Rede Edukasaun Timor-Leste Coalition for Education (TLCE) José Monteiro husu Ministériu Edukasaun tenke kontinua tau prioridade iha formasaun avansadu ba profesór iha Ensinu Tékniku Vokasionál (ETV) sira nune'e bele kontribui ba modernizasaun ETV iha Timor-Leste.

Nia dehan, professór ne'ebé hanorin iha tékniku vokasionál ne'e formasaun ba sira-ne'e tenke update hela de'it, bazeia ba situasaun no modernizasaun ohin loron nian.
"Kada tinan Ministériu Edukasaun tenke kontinua tau prioridade iha formasaun avansadu ba profesór sira iha Ensinu Tékniku Vokasionál (ETV) liga ba situasaun no modernizasaun ohin loron nian nune'e bele halo dezenvolvimentu ba ETV iha Timor-Leste," nia hatete.
Nia dehan, Ensinu Sekundáriu Tékniku Vokasionál iha ema nian rain ne'e moderniza tebes, tanba ne'e Ministériu Edukasaun tenke foti ezemplu husi rai seluk liu-liu ba formasaun ba professór sira nune'e bele bele moderniza sistema hanorin, teoria no prátika ba estudante sira.
Nia dehan, alende formasaun tenke investe mós iha ekipamentu prátika sira hodi fasilita estudante sira prátika, la’ós naran tiha ETV, maibé realidade la hanesan.
"Ita tenke investe iha Ensinu Tékniku Vokasionál sira, tanba ETV ne'e kuntribu tebes ba asesu kampu traballu no kria kampu traballu ba ema seluk," Koordenadór Rede Edukasaun Timor-Leste Coalition for Education TLCE Monteiro dehan.
Entretantu Ministra Edukasaun, Dulce de Jesus Soares hatete, Ministériu Edukasaun sei hadia di'ak liután setór edukasaun iha tinan oin, inkliu modernizasaun ba Ensinu Tékniku Vokasionál sira.
"Modernizasaun Ensinu Tékniku ba área infraestrutura ne'ebé, formasaun ba professór no moderniza ekipamentu prátika ba ETV sira," nia informa.
Nia dehan, iha mós programa teknolojia informasaun no komunikasaun ba edukasaun aprendizajen iha ensinu tékniku vokasionál no hadi'a ho kurríkulu nasionál no tékniku vokasionál.
Nia dehan, atu moderniza Ensinu Tékniku Vokasionál la’ós investe de'it iha formasaun ba professór, maibé ba mós iha área oin-oin ne'ebé kontribui ba dezenvoliventu modernizasaun ETV.