- Publika iha: 04 Dezembro 2024
Ministériu Edukasaun halo ona pagamentu subsídiu ba profesór foun hamutuk atus haat haatnulu resin tolu (443) ne'ebé mak koloka kada eskola iha tinan 2024 foin lalais.
Diretóra Rekursu Umanu iha Ministériu Edukasaun Anita Tavares Ribeiro dehan, subsídiu ne'ebé Ministériu Edukasaun halo pagamentu ne'e ba subsídiu kolokasaun no transporte nian.
Nia dehan, durante kolokasaun ba professór sira-ne'e seidauk halo pagamentu ba subsídiu hodi fasilita sira-nia servísu.
"Dadaun ne'e ita hahú halo ona pagamentu ba subsídiu ba transporte no kolokasaun nian ba ita-nia professór foun hamutuk 443 ne'ebé koloka ba eskola sira," nia dehan.
Nia dehan, pagamentu subsídiu kolokasaun no subsídiu transporte ba professór/a foun sira-ne'e tama ona ba idak-idak nia konta bankária.
"Pagamentu subsídiu ba professór na'in 443 ne'e ho orsamentu hamutuk, $ 1,063,377.00," Diretora Rekursu Umanu iha ME Tavares informa.
Nia informa profesór iha nivel baxarelatu simu montante $278.00, lisensiatura montante $ 288.00, ho nune'e husu ba professór sira bele ba cek ona iha konta bankária idak-idak nian.
Entretantu Diretór Edukasaun Munisípiu Manatuto, Patricio da Cruz Quintão, dehan, professór sira-nia subsídiu ne'e tuir lista prezensa iha eskola no munisípiu haruka mai Ministériu Edukasaun.
"Ita-nia avaliasaun ba professór/a foun hirak ne'e dezenpeñu di'ak tebes no sira iha direitu ba subsídiu kolokasaun no transporte tanbá ne'e husu nafatin ba professór hirak ne'e atu kontinua hatudu dezenpeñu di'ak nafatin iha futuru," nia hatete.