- Publika iha: 20 Novembro 2024
Estudante Estajiáriu ne’ebé hala’o Estájiu Servisu Sosial (ESS) husi Universidade Nacional Timor Lorosa'e (UNTL), Faculdade de Ciências Sociais (FCS) hetan oportunidade hodi hasae bandeira iha postu administrativu Maucatar, munisípiu Covalima.
Egi Alberto Simão Saldanha Barreto hanesan koordenadór suku Ogues hatete, hanesan estudante universitariu hetan konfiansa husi komunidade no autoridade ne’e nu’udar oportunidade, tan-ne'e prezensa husi ESS hodi haforsa no ajuda sira iha parte hotu tuir kbiit ne'ebé iha.
"Ita hanesan estudante estajiáriu banhira tun iha kominudade nia leet, ita mós pertense ba kominidade, tanba ne’e iha komunidade no autoridade lokal ita sempre hetan oportunidade tantu husi postu no munisipiu.
Ita ne’ebé hala’o ESS ho prezensa hodi observa, alista no koopera ho sira oinsa atu fó solusaun, tanba ita maka konfiansa boot ba sira, ita maka sira-nia esperansa iha prezensa ne'e rasik, ho sira-ne'e maka isar bandeira primeira semana iha fulan Novembru ne'e fó konfiansa tomak ba ita ESS, FCS-UNTL 2024 iha postu Maucatar," Tenik Koordenadór ESS suku Ogues.
Nia dehan, sente kontenti tebes, tanba konfiansa sira hetan fó husi xefe suku Ogues no Administradór Postu-Administrativu Maucatar hodi hamutuk ho joven sira responsável ba korru, korpu-isar bandeira, Mestre Serimónia (MC).
Febriano Pereira hanesan Xefe Suku Ogues hatete, iha postu-administrativu maucatar sempre hasae bandeira kada suku, tan ne'e fó oportunidade ba estudante estajiáriu sira hamutuk ho joven sira.
"Iha postu administrativu Maucatar sempre hasae bandeira iha primeira semana fulan-fulan hamutuk ho funsionariu hotu, tan-ne'e alin estudante estajiáriu sira mós iha, tanba ne’e fó ba sira hamutuk ho joven sira reprezenta suku Ogues hodi hasae bandeira ne'e rasik," Dehan Xefe Suku Ogues Febriano.
Nia hatutan, konfiansa ne'ebé fó ba estudante sira, tanba sira-ne'e bele hola mós parte hanesan komunidade.
"Konfiansa ne'ebé fó ba estudante estajiáriu sira, tanba sira-nia estajiu ne'e hanesan mós parte integrasaun ida husi kominidade, entaun ami hakarak uniformiza estudante universitariu estajiáriu sira hanesan mós estrutura suku," Tenik Xefe Suku Ogues.