- Publika iha: 20 Novembro 2024
Administradór postu-administrativu Maucatar, munisípiu Covalima Laurentino de Jesus hatete, prezensa estudante sira liuhusi Estájiu Servisu Sosial (ESS) husi universidade Nacional Timor Lorosa'e (UNTL) liuhusi Faculdade de Ciências Sociaias (FCS), bele lori esperansa ba komunidade.
"Prezensa estudante sira-nian nu’udar esperansa ba komunidade, tanba ne’e ha'u nu'udar Administradór Postu-Administrativu Maucatar tuir ha'u-nia hanoin ho prezensa husi estudante sira mai halo estájiu iha ne'e ha'u kontenti tebes, tanba haree husi nivel edukasaun hanesan ami autoridade lokal ne'e minimu liu, maibé liuhusi imi-nia prejensa bele hafanun ami atu hatene administrativamente suku nian liuliu ba livru 19 ne'e," Dehan Administradór postu Maucatar iha suku Matai.
Administradór Laurentino dehan, prezensa estudante estajiáriu hodi bela apoiu servisu humutuk iha suku sira atu bele halo dezentralizasaun no aplika matenek ne'ebé-sira iha tuir siénsia ne'ebé-sira iha.
"Imi iha ne'e mai ita servisu hamutuk hodi imi bele aplika matenek ne'ebé iha atu haree ba dezentralizasaun iha suku sira no haree ba ami-nia probelema sosial sira hodi bele hatutan ba fatin ne'ebé iha aprende ba," Tenik nia.
Enkuantu, Guido Francisco Soares hanesan Komunidade iha suku Matai hatete, nia sente kontenti ho prezensa estudante sira-nian, tanba bele lori esperansa foun ba sira.
"Ha'u kontenti tebes ho prezensa estudante UNTL iha ami nia leet, tanba ami bele sente katak estudante sira mós tau importante ba ami-nia suku sira hodi observa, peskiza kona-ba situasaun real ne'ebé-ami enfrenta liuliu ba isu sosial sira," Dehan Guido.
Nia hatutan, sira nafatin koopera hodi sente katak sira-nia prezensa iha suku Matai laos tanba estudante maibe tanba komunidade.
"Ami sente prezensa estudante FCS-UNTL iha ami-nia leet hanesan mós membru ida husi komunidade, tanba ami sei koopera ba malu ho di’ak hodi haree ba atividade sira-ne'ebé realiza iha komunidade tantu suku nian," Tenik nia.