ANAAA Re-Akredita Ona Estudu Engenaria Mekanika Iha UNTL

Ajénsia Nasionál ba Avaliasaun Akreditasaun Akadémika (ANAAA) re-akredita ona estudu Enjeñaria Mekánika iha Universidade Nacional Timor Lorosa'e (UNTL).

Vise-Reitór Asuntu Akadémika no Garantia Kualidade UNTL Samuel Venâncio de Sousa Freitas dehan, kursu estudu Enjeñaria Mekánika ne'e eziste ho grau lisensiatura, no halo ona avaliasaun iha tinan 2018, maibé iha buat balun ne’ebé presiza hadia.

Nia hatete, iha avaliasaun primeiru ne'e presiza halo mudansa ba dosente, kurríkulu, infraestrutura no fasilidade sira seluk tan hodi bele priense kriteiru nune'e bele hetan akreditasaun.

"Liuhusi avaliasaun ne’ebé mak (ANAAA) halo foin lalais ne'e, bele re-akredita ona estudu Enjeñaria Mekánika iha Universidade Nacional Timor Lorosa'e," nia hatete.

Nia espera, liuhusi akreditasaun bele lori progresu di'ak hodi kontribui ba hadi'a kualidade iha universidade liu-liu departamentu sira.

"Ami agradese tebes, tanba bele hetan ona re-akreditasaun ba estudu Enjeñaria Mekanika iha UNTL," Vise-Reitór Freitas hatete.

Iha fatin hanesan Diretór Ezekutivu ANAAA Nilton Paiva dehan, re-akreditasaun ne'e halo hodi asegura elijibilidade no programa estudu Enjeñaria Mekánika ne'ebé oferese husi UNTL.

"Prosesu re-akreditasaun ne'e bazeia ba padraun ho kritéria husi ANAAA priense ona tuir avaliasaun ne’ebé mak avaliadór sira halo durante ne'e," nia dehan.

Nia dehan, avaliasaun ne'e halo direita husi avaliadór internasionál husi Malaysian Coalifications Agency (MCA) no avaliadór nasionál sira seluk.