TLCE : ESTV Sei Menus Fasilidade Prátika

Tuir peskiza ne’ebé Timor-Leste Coalition for Education (TLCE) halo ba Ensinu Sekundáriu Tékniku Vokasionál (ESTV) rezultadu hatudu katak maoria sei menus fasilidade prátika ba estudante sira.

Diretór Ezekutivu TLCE, Jose Monteiro hatete, peskiza ne'ebé halo iha fulan hirak liuba, foka de'it ba ensinu sekundáriu tékniku vokasionál sira iha territóriu laran, hodi identifika problema ne'ebé sira enfrenta.

"Iha peskiza ne'e ami identifika katak ESTV sira sei menus fasilidade prátika hanesan, komputadór, projetór no seluk tan ne'ebé nesesidade ba prátika nian, inklui kondisaun balun sei menus," nia hatete.

Nia dehan, tuir loloos ensinu sekundáriu tékniku vokasionál ne'e tenke iha ekipamentu prátika nian ba estudante sira hodi fasilita sira aprende, maibé realidade hatudu katak sira kontinua menus fasilidade to'o agora.

“Liga ba situasaun ne’ebé ensinu sekundáriu tékniku vokasionál ESTV sira enfrenta ne'e ami husu ba Ministériu Edukasaun atu bele tau prioriadade iha orsamentu atu bele rezolve," TLCE Monterio hatete.

Entretantu Diretór Nasionál Ensinu Sekundáriu no Tékniku Vokasionál iha Ministériu Edukasaun Fernando Mouzinho Gama dehan, dadaun ne'e proposta ne'ebé sira simu husi ESTV sira hamutuk 15 mak hato'o problema menus ekipamentu prátika hanesan komputadór no projetór.

"Ha’u hanoin iha 2025, ita fó prioridade atu sosa komputadór ba ita-nia ensinu tèkniku vokasionál sira, liu-liu ba materia multimedia ninia, ha’u hanoin kuaze pursentu 50 mak sei menus komputadór, maibé hakarak ka lakohi ita sei kompleta nesesidade ba eskola 15 ne'ebé sei menus komputadór," nia informa.

Nia hatete, sira sei esforsu nafatin sosa materiál sira ba ESTV, tanba la'ós de'it komputadór, maibé ekipamentu seluk tan hanesan ba agrikultura no laboratóriu nian, tanba ne'e iha ona planu ba tinan 2025 nian sei sosa komputador 30 kada eskola depende ba kursu ne'ebé importante.