ME Rezolve Ona Problema Menus Profesór iha eskola sira

Ministériu Edukasaun (ME) rezolve ona problema menus profesór iha eskola sira iha territóriu Timor-Leste laran tomak liuhusi kolokasaun profesór ne’ebé ME halo.

Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hatete, Ministériu Edukasaun rezolve problema menus profesór liuhusi kolokasaun profesór ba eskola sira iha etapa primeiru hamutuk atus-lima-neen-nolu-resin-walu (568) no etapa segundu koloka tan atus-hat-sia-nolu-resin-hitu (497).

"Dadaun ne'e ita rezolve ona problema menus Profesór iha eskola territóriu laran tomak, foin lalais ne'e halo enkontru ho Diretór Servisu Edukasaun Munisípiu sira, maibé sira la kestiona katak sei menus profesór iha eskola," nia dehan.

"Ha'u atu hatete ba mídia katak to'o agora Diretór Servisu Edukasaun Munisípiu sira la mai lamenta ho menus profesór, ha'u espera katak ba oin sei la iha tan eskola ida mak enfrenta problema menus profesór," Sekretáriu Estadu Ensinu Sekundáriu Jerál no Tékniku Vokasionál Lemos dehan.

Nia dehan, total profesór ne’ebé destaka ba eskola sira liuhusi rekrutamentu etapa primeiru no segundu ne'e hamutuk rihun-ida-neen-nolu-resin-lima (1.065).

Nia hatutan, Ministériu Edukasaun identifika ona eskola sira ne’ebé mak sei enfrenta tan problema seluk no dadaun ne'e governu esforsu hela hodi bele rezolve.

Entretantu Diretór Servisu Edukasaun Munisípiu Lautém, Anibal Fernandes, rekoñese sira sei menus profesór iha Lautém, maibé nia orienta diretór eskola atu haruka profesaór nain ida hanorin disiplina rua, ho meiu ne’ebé mak sira utiliza hodi kompleta profesór ba kada disiplina maske profesór ida tenke lori disiplina rua.

"Ita-nia eskola primeiru no segundu síklu mak komesa rezolve oituan-oituan ona, ba fali terseiru síklu no ensinu sekundáriu mak profesór disiplina ne'e ita presiza tan hodi koloka kada disiplina, Ensinu sekundáriu ne'ebé iha ne'e kuaze profesór menus, maibé ita orienta profesór ida lori matéria rua," nia salienta.