ME Distribui Karteira Eskolár 8000 Ba Eskola Ne’ebé Identifika Ona

Ministériu Edukasaun (ME) dadaun ne’e halo distribuisaun karteira eskolár hamutuk rihun ualu (8000) ba eskola ne’ebé identifikadu iha territóriu laran tomak.

Diretór Nasionál Infraestrutura no Edukativu iha Ministériu Edukasaun (ME) Hélio Lopes dehan, eskola atus-resin ne’ebé identifikadu ba distribuisaun karteira eskolár kompostu husi pre- eskolár to’o ensinu sekundáriu.

“Ministériu Edukasaun distribui karteira eskolár hamutuk rihun ualu 8000 ba eskola ne’ebé ita identifika hamutuk atus-resin iha territóriu laran tomak,” nia hatete.

Nia hatutan, distribuisaun ba karteira eskolár ne’e la tuir proposta husi parte eskola sira fó, maibé bazeia ba dadus verifikasaun ministériu nian ne’ebé indika eskola balun presiza tebes kadera no meza hodi responde ba nesesidade iha eskola.

“Ami distribui dadus ne’ebé ami iha, másimu hetan atus-ida 100 minimu mak hetan hitu-nulu (70) ba eskola sira seluk bele utiliza lai karteira eskolár ne’ebé mak sei di’ak hodi hein Ministériu Edukasaun kompleta fali,” DNIE Lopes hatete.

Nia dehan, fiar katak husi distribuisaun ne’e eskola hotu tenke garante katak, karteira eskolár ne’ebé ministériu fó ne’e hodi bele utiliza ho kuidadu ba tempu naruk nian.

“Total orsamentu ne’ebé ita tau hodi sosa karteira eskolár hirak ne’e hamutuk $700.000 iha orsamentu tinan kotuk nian no ba tinan ida-ne’e ita tau tan orsamentu $900.000 hodi sosa tan, nune’e bele kompleta ba saladeaula foun sira ne’ebé mak foin konstrui, garante katak ba oin estudante no ema hotu sei la kestiona tan kona-ba problema menus karteira eskolár iha eskola,” nia salienta.

Iha parte seluk Dirétor Servisu Edukasaun Mùnisipiu Ermera Francisco Marto de Araujo dehan, iha Ermera liu-liu iha Railaco ba eskola báziku filial Tocoluli hamutuk unidade 40 falta eskola sira seluk hein etapa tuir mai.

“Ita sei iha mós eskola hamutuk 8 mak sei simu tan karteira eskolár no unidade bazeia ba dadus ne’ebé husi Ministériu Edukasaun rasik no sei la tuir proposta ne’e ita fó,” nia dehan.

Nia informa, ba eskola seluk ne’ebé la tama iha lista signifika katak la simu, tanba sira sei iha hela karteira eskolár natoon hodi apoiu prosesu aprendisajen kada loron iha eskola.