- Publika iha: 24 Outubro 2024
Estudante ensinu supérior na’in-neenulu resin neen (66) tuir ezame sertifikasaun hodi hetan akreditasaun ba sira-nia diploma husi governu liu-liu Ministériu Ensinu Supérior Siénsia no Kultura MESSK.
Ministru Ensinu Superior Siénsia no Kultura, José Honorio da Costa Jerónimo, hatete, estudante na’in-66 ne'e remata ona estudu iha nivél ensinu superior, maibé seidauk hetan rekoñesimetu husi governu.
"Ohin ita-nia estudante finalista hamutuk 66 mak tuir ezame sertifikasaun hodi hetan akreditasaun ba sira nia diploma, nune'e bele hetan legalizasaun bainhira presiza atu halo buat ruma," nia dehan.
Nis dehan, ezame sertifikasaun ne'e governu halo hodi fasilita, estudante sira ne’ebé mak remata ona estudu iha tinan 2009 tanba iha tempu ne’eba loke universidade barak no governu seidauk halo akreditasaun.
"Ezame sertifikasaun ne'e importante tebes, atu bele ajuda sira hetan akreditasaun ba sira-nia diploma no hetan rekoñesimetu husi governu no estadu," nia hatete.
Tanba ne'e ba sira ne’ebé seidauk rejistu hodi tuir exame bele mai rejistu hodi tuir exame sertifikasaun ne'e hodi hetan akreditasaun.
Entrertantu Koordenadór ezame sertifikasaun 2024, Agustinho Almeida Fernandes hatete, kandidatu ne'ebé dadaun ne'e tuir ezame sertifikasaun ne'e hamutuk 66 husi universidade tolu iha Timor-Leste no ida husi Kupang Indonézia.
"Na’in-37 husi Universidade Dili (UNDIL), na’in-2 husi Universidade Oriental Timor Lorosa'e (UNITAL), 24 husi Universidade da Paz (UNPAZ), nain 3 husi Universidade Kupang.
Estudante hirak ne'e iha área Agrikultura, Saúde Públika, Matematika, Língua Ingleza, Pendidikan Pelajaran Agama, Relasaun Internasionál, Administrasaun Públika, Politika Dezenvolvimentu, Direitu Kriminal, Direitu Sivil, Siénsia Direitu, Jestaun, Kontabilidade, Siénsia Edukasaun Ekonomia, Manajemen Keuangan," nia saliente.
Nia dehan, objetivu prinsipál husi ezame sertifikasaun ne'e oinsá mak MESSK legaliza no rekoñese maluk sira ne'ebé uluk iha 2009 ba kotuk ne'e la hetan akreditasaun, tanba iha tempu ne'ebá loke universidade barak maibé governu rasik la hatene ikus mai governu lakohi sertifika sira-nia diploma entaun liuhusi prosesu ezame sertifikasaun ne'e atu bele rekoñese, nune'e bele legaliza sira dokumentu nasionál.