- Publika iha: 17 Outubro 2024
Governu Brazil apoiu Ministériu Edukasaun hodi fasilita formasaun ba profesór sira husi Ensinu Sekundáriu Tékniku Vokasionál iha Teritóriu laran tomak.

Sekretáriu Estadu Ensinu Sekundáriu Jeral no Ensinu Sekundária Tékniku Vokasionál Domingos Lopes Lemos hatete, Governu Brazil apoiu fasil ita formasaun ba profesór ESTV sira ne’e liu husi Kooperasaun Bilateral entre Brazil no Timor-Leste kona-ba projetu pilotu formasaun profesór ESTV iha territóriu laran tomak.
Enkuantu nia dehan, liga mós ba programa IX Governu Konstitusionál nian mak setór edukasaun esensiál tebes, atu alkansa edukasaun ida transformativa ba sosiedade Timor-Leste hodi alkansa vizaun ba dezenvolvimentu.
“Ita koopera ho Governu Brazil no sira apoiu ita liu-liu kona-ba formasaun kapasitasaun ba profesór sira iha Eskola Sekundária Tékniku Vokasionál (ESTV) hodi hadia kualidade ensinu nian iha eskola sira,” nia dehan.
Tanba ne’e nia dehan, Governu liuhusi Ministériu Edukasaun sei esforsu makaas hodi hadia kualidade ESTV nian iha territóriu laran, kona-ba ensinu sekundária jeral, tanba ministériu servisu hamutuk ho formadór sira husi Portugal hodi apoiu formasaun.
“Espera katak ita-nia kooperasaun ne’e sei kontinua no laharee de’it ba formasaun profesór mai béba mós area seluk ne’ebé mak presiza tebes ba dezenvolvimentu setór edukasaun,” nia informa.
Entretantu Ministra Konselheira no Enkaregada Negósiu Embaxada Brazil iha Timor-Leste Rita de Cássia Lott Marques, dehan, asina MoU kona-ba Projetu Pilotu Formasaun Profesór iha Ensinu Sekundária Tékniku Vokasionál iha Timor-Leste iha lista fixu ona hein implementa de’it.
“Ami fiar katak projetu pilotu ne’e hetan susesu no ami votu sussesu ba projetu ne’e kontinua iha baze ne’ebé luan liu iha tinan oin, no profesór Brazil sira hamutuk ho sira-nia kolega Timor oan bele kontribui hodi hametin formasaun profisional iha Timor-Leste,”nia saliente
Tanba nia dehan, Governu Brazil prontu apoiu Governu Timor-Leste liu-liu ba dezenvolvimentu setór edukasaun bainhira presiza.