- Publika iha: 26 Junho 2013
Programa Analfabetizasaun iha distritu sira agora dadaun provizoriumente paradu tanba parte tekniku sira sei halo nia administrasaun liu-liu kona ba kontratus no selesaun ba profesor sira.
Diretor Ensino Recorente,Filomeno Lourdes dos Reis Belo, hateten tekniku no professor sira foin mak halo sira nia administrasaun tanba Orsamentu Jeral Estadu ba tinan 2013 foin aprova iha fulan Marsu.
“Oinsa para ita bele hetan profesores ne’ebe mak kualifikadu pelo menus hatene Tetun no Portugues oituan atu nune’e sir abele transmite fila fali lisaun sira ne’e ba ita nia katuas ferik sira ,liu-liu ba ita nia jovens no adultus,” dehan Diretor Ensino Recorente,Filomeno Lourdes dos Reis Belo, (08/05), iha Vilaverde, Dili.
Diretor Belo dehan, dadaun ne’e profesor sira ne’ebe fo formasaun ba komunidade sira iha distritu 13 sufsiente.
Alem de ne’e nia hatutan, Ministeriu Edukasaun mos loke fali ona eskola hanaran HALFANAMOR iha 442 sukus salas de aulas no mos ekivalensia.
Programa HALFANAMOR ne’e fo liu prioridade ba jovens ka adultu sira ne’ebe la konsege akaba sira nia estudu iha eskola.
“Jovens sira ne’ebe uluk la konsege konklui sira nia estudu atu sira bele prepara sira nia an hodi bele ba ekivalensia ba Ensino Sekundariu),” dehan Diretor Belo.
Iha parte seluk Vise Dekanu Universidade Nasional Timor-Lorosa’e (UNTL), Pedro Soares preokupa tebes tanba distritu balun deklara ona katak livre ona husi analfabetu maibe balun mos seidauk to’o agora.
“Ita tenke deklara nasionalmente, katak Timor-Leste livre ona husi analfabetu,” Vise Dekanu Soares preokupa.
Tanba ne’e nia husu ba ministeriu relevante formasaun ba analfabetizasaun tenke kobre iha distritu hotu, nune’e povu Timor mos bele hatene lee no hakerek.