- Publika iha: 15 Outubro 2024
Ministra Edukasaun Dulce de Jesus Soares dehan, direjente eskola sira tenke iha kapasidade di’ak hodi lidera no halo jestaun ba eskola ho di’ak.
Nia dehan, liga ba asuntu kapasidade ne'e mak dadaun ne'e Ministériu Edukasaun fó formasaun espesializada ba direjente eskola sira hodi eleva sira-nia kapasidade hodi jere eskola ho di’ak.
Nia dehan, bainhira direjente eskola sira iha kapasidade di’ak hodi lidera eskola fiar katak problema sira hanesan, merenda eskolar la to'o, ekipamentu eskola la iha ida-ne'e sei la akontese, tanba ne'e Ministériu Edukasaun kontinua fasilita kona-ba formasaun espesializada ba jerente sira.
"Ita-nia jerente eskola sira tenke iha kapasidade di’ak hodi lidera no halo jestaun ba eskola," ME Santos dehan.
Nia dehan, direjente sira ne'e presija tuir formasaun tanba sira mak tenki implementa servisu sira ne’e hotu liuhusi apoiu edukasaun iha nivel nasionál nomós iha nivel munisipál.
“Mezmu ita iha kurríkulu di’ak, iha livru ne’ebé mak di’ak, ita iha polítika ne’ebé di’ak, maibé xave mak dirijente eskola sira, tanba sira mak tenki implementa servisu sira-ne’e hotu liuhusi apoiu edukasaun iha nivel nasionál nomós iha nivel municipal,” dehan Ministra.
Tanba ne'e nia dehan, formasaun primeiru halo iha Munisípiu Aileu, hanesan mós pilotajen ida atu haree husi konteúdu formasaun nomós sei envolve diretór eskola sira ne’ebé mak iha ona esperiénsia hodi jere eskola ho di’ak.
Entretantu Koordenadór Rede Edukasaun Timor-Leste Coalition for Education TLCE Jose Monteiro dehan, lideransa eskola sira tenke iha kapasidade nune'e mós responsabilidade hodi jere no transforma edukasaun iha komunidade.
"Lideransa eskola sira tenke iha responsabilidade, inovativu, hanoin krítiku, analítiku, hodi bele ajuda estudante sira", nia salienta.
Tanba ne'e Ministériu Edukasaun iha responsabilidade tomak hodi fasilita formasaun avansadu sira ba profesór no dirijente eskola sira.