- Publika iha: 15 Outubro 2024
Governu Korea apoiu Ministériu Ensinu Supérior Siénsia no Kultura (MESSK) hodi implementa Programa Peace Education ba universidade neen (6) iha Timor-Leste.
Ministru Ensinu Supérior Siénsia no Kultura (MESSK) Jose Honório da Costa Pereira Jerónimo dehan, universidade sira presiza tebes materia Peace Education hodi bele transforma karakter estudante sira hodi bele sai husi hahalok konflitu hodi promove paz no estabilidade iha universidade.
Nia dehan, durante ne'e paz iha universidade sira iha,maibé seidauk la’o ho di’ak, tanba ne'e mak, universidade balun sempre kria konflitu entre dosente no estudante, estudante ho estudante.
"Liga ba situasaun hirak ne'e mak governu Korea apoiu Ministériu Ensinu Supérior Siénsia no Kultura hodi implementa programa Peace Education iha universidade akreditadu neen (6) iha Timor-Leste," nia dehan.
Nia dehan, universidade neen (6) ne’ebé mak sai hanesan programa pilotu ne'e la signifika katak sira mak sempre kria konflitu.
"Universidade akreditadu neen (6) ne’ebé mak sai hanesan programa pilotu Peace Education ne'e hanesan, Universidade Oriental de Timor-Lorosa'e (UNITAL) Institutu Supérior Cristal (ISC), East Timor Coffee Institute (ETCI), Institutu Politekniku Betano (IPB), Universidade Katólika Timorense (UCT), Institutu Universitariu Naroman Esperansa (IUNE)," Ministru MESSK Honório dehan.
Nia dehan, Peace Education ne'e hanesan matandalan ida hodi hanorin ba estudante sira liu-liu iha ensinu supérior sira, tanba universidade sira iha kompeténsia tomak hodi eduka komunidade sira oinsa moris iha paz.
"Programa Peace Education ne'e governu Korea apoiu ita oinsa atu bele tau iha kurríkulu nasionál no sai hanesan materia ida hodi hanorin ba estudante sira," nia informa.
Ministru ne’e dehan, apoiu ba implementa programa Peace Education ne'e liuhusi MoU ne’ebé mak governu Korea asina ona ho MESSK no durasaun durante tinan 1 no sei halo avaliasaun hodi kontinua ba universidade sira seluk.
Iha fatin hanesan Prezidente Institutu Politékniku Betano Acasio Amaral dehan, durante konflitu iha eskola akontese duni,maibé ne'e problema entre arte marsiais no estudante sira lori malu to'o iha areadór eskola nian.
"Maibé atu ami nafatin fó hatene ba estudante sira katak kuandu tama iha Institutu Politekniku Betano ne'e estudante la’ós arte marsiais A ka B hodi kria konflitu," Prezidente IPB Acasio dehan.
Tanba ne'e nia dehan, programa Peace Education ne’ebé mak governu Korea apoiu MESSK hodi implementa iha eskola ne'e, bele kontribui ba muda karakter estudante sira nian atu bele livre husi konflitu no tempu to'o ona hodi kontribui ba kria paz no estabilidade iha sosiedade.