Apolinario Hamonu Matan-Been Banhira Partisipa Iha Oan nia Gradusaun

Aman faluk Apolinario do Nasimento husi munisípiu Covalima, postu administrativu Zumalai, suku Tasilin servisu hanesan agrikultór hamonu mata-been, tanba orgullu haree oan Gabriel Nelson do Nasimento simu diploma graduasaun husi Universidade Nacional Timor Lorosa’e (UNTL), Faculdade de Engenharia, Ciência e Técnologia (FECT), Departamento de Informática.

“Ohin ha’u ho emosaun ituan banhira haree ha’u-nia oan mane hetan susesu ne’ebé inan-aman, ami presiza no iha nia susesu ne’e mós nia inan lapartisipa, tanba nia inan fila ba mundu seluk, maibé ha’u tanba orgullu mesmu nia aman ha’u servisu hanesan agrikultór ho dedikasaun ne’ebé fó ba nia, loron ohin bele hatudu duni rezultadu ida ne’ebé ami hein,” dehan Apolinario bainhira partisipa iha serimónia graduasaun UNTL nian ba dala XXX iha Jinázio (GMT), Díli foin lalais.

Nia hatutan, Gabriel hanesan oan dahuluk, tanba ne’e nia esforsu tebes atu nia oan labele abandona estudu.

“Gabriel hanesan ha’u-nia oan mane primeiru ho nune’e ha’u esforsu tebes hodi nia tenki susesu, tanba mesmu ha’u tamat de’it SMA, maibé ha’u iha objetivu ida ba nia durante tinan naruk nia laran no agradese ba nia, tanba kumpri duni nia dever tuir dedikasaun ne’ebé ha’u fó hodi ohin loron nia bele remata estudu ho grau lisensiatura,” Tenik nia.

Nia akresenta, estudante universidade sira tenki kaer metin katak, aman-inan no profesór sira maka sai hanesan edukadór no edukadora ba sira-nia moris hodi sai hanesan koñesimentu baze iha moris.

“Ba oan sira ne’ebé eskola iha UNTL tenki kaer metin prinsipiu rua ne’ebé sai hanesan koñesimentu baze ba oan imi-nia estudu maka hanesan inan-aman no profesór sira imi tenki respeitu, tanba sira-ne’e maka eduka imi to’o ohin loron bele sai ema ne’ebé susesu tuir mehi ne’ebé imi hakarak,” Nia akresenta.

Iha fatin hanesan Gabriel Nelson do Nascimento hateten, susesu ne’ebé nia hetan, tanba sakrefisiu husi família.

“Susesu ne’ebé ha’u hetan nu’udar susesu ida ne’ebé mai husi grasa Nai-nian no ba buat hotu liuliu ha’u nia papa, mama mesmu sira-nain rua ema agrikultór, maibé sira-nia esforsu nia hakarak oan ami tenki susesu no ha’u kaer metin papa nia liafuan katak husik papa maka eskola to’o iha SMA, maibé oan imi tenki liu papa,” Dehan Gabriel.

Nia hatutan, iha nia susesu sente triste tanba nia inan laiha prejensa mesmu iha prosesu tomak nia ina sempre korajen nian.

Gabriel dehan, husi tíitulu foun ne’ebé nia hetan sei esforsu liutan hodi aplika tuir siénsia ne’ebé hetan atu bele tane aas dignidade inan-aman nian.

“Iha títulu foun ne’ebé hetan ne’e hanesan buat todanida ne’ebé presiza esforsu no aprende nafatin hodi tane dignidade husi inan-aman nian no kontribui no hodi halo dezenvolvimentu ba ita-nia nasaun,” nia dehan.