Quinta, Julho 18, 2024

Reitór Universidade Nasionál Timor Lorosa’e (UNTL), Dr. João Soares Martins dehan, komunidade akadémika sira iha obrigasaun hodi hatene fatór sira ne’ebé mak kontribui ba tranzmisaun moras rabies iha Timor-Leste.

Reitór Universidade Nasionál Timor Lorosa’e (UNTL), Dr. João Soares Martins dehan, komunidade akadémika sira iha obrigasaun hodi hatene fatór sira ne’ebé mak kontribui ba tranzmisaun moras rabies iha Timor-Leste.

Nia dehan, atu hasa'e koñesimentu komunidade akadémika nian kona-ba moras rabies UNTL realiza konferénsia internasionál kona-ba moras rabies, tanba Timor-Leste dadaun ne'e iha ona kazu rabies.

"Komunidade akadémika iha obrigasaun hodi koñese kona-ba tranzmisaun moras rabies no sira bele eduka ita-nia komunidade sira atu livre husi fatór sira ne’ebé mak kontribui ba tranzmisaun moras rabies. Dadaun ne'e iha Timor-Leste mós rejistu ona iha Oecusse," nia dehan bainhira sai oradór iha Semináriu Internasionál ho tema “Scientific Coorperation to Create a Rabies-Free Environment in Timor-Leste” ne’ebé hala’o iha salaun CNE Lalini Larigutu, Díli.

Nia dehan, moras rabies ne'e komunidade sira seidauk iha koñesimentu kona-ba sintomas, tranzminsaun, nune'e mós halo prevensaun, tanba ne’e akadémiku sira iha obrigasaun atu bele fahe informasaun ne’ebé mak sira hetan husi konferensia internasionál ida-ne'e ba komunidade hodi bele prevene an husi virus rabies.

"Dadaun ne'e ita-nia governu liu husi Ministériu Saúde (MS) no mos Ministériu Agrikultura no Peska Pekuária Peska no Floresta (MAPPF) ne’ebé maka servisu makaas tebes atu para alastra virus rabies ne'e ba komunidade para hatene virus ne’e nia konteúdu," nia salienta.

Entretantu, Vise-Ministru ba Operasionalizasaun Hospitais. Dr. Flavio Brandão dehan, UNTL sensivel duni ba problema moras rabies nian no sira iha papél atu bele ajuda komunidade sira atu bele halo preparasaun no prevensaun.

"Dadaun ne'e Ministériu Saúde halo hela esforsu hanesan halo prevensaun liu husi halo vasinasaun ba animal asu sira, nune'e mós halo peskiza espesífiku ida hodi buka hatene di’ak liu tan konteúdu husi virus rabies ne'e rasik," niain forma.

Iha parte seluk, estudante UNTL husi Faculdade de Medician e Ciência da Saúde nia, Departamento de Enfermagem, Manuela Ximenes, dehan importante tebes atu halo asaun sira hodi prevene virus rabies ne’ebé mak komesa rejistu ona iha Timor-Leste.

"Hanesan komunidade akadémika iha obrigasaun hodi eduka família komunidade sira atu bele halo prevensaun, atu nune'e bele livre husi virus ne'e, maibé buat hotu fila ba ita ida-idak iha konsiénsia rasik," nia dehan.

Tanba ne'e nia dehan, komunidade mós tenke halo tuir saida mak fó sai husi Ministériu Saude kona-ba prevensaun virus ne'e rasik ho lia fuan ida katak saúde iha ema ida-idak nian liman rasik.