Quinta, Julho 18, 2024

Atu eleva kualidade ensinu superiór governu liuhusi Ministériu Ensinu Superiór, Siénsia no Kultura (MESSK) apoiu suvensaun públiku ba instituisaun ensinu superiór hamutuk 17 iha Timor-Leste.

Atu eleva kualidade ensinu superiór governu liuhusi Ministériu Ensinu Superiór, Siénsia no Kultura (MESSK) apoiu suvensaun públiku ba instituisaun ensinu superiór hamutuk 17 iha Timor-Leste.

Ministro MESSK, José Honório da Costa Pereira Jerónimo, dehan, instituisaun ensinu superiór 17 ne’ebé governu apoiu suvensaun públiku ne'e maka Universidade da Paz (UNPAZ), Universidade Díli (UNDIL), Universidade Oriental Timor Oriental (UNITAL), Universidade Católica Timorense (UCT), Dili Institute of Tecnologi (DIT), Institute of Business (IOB), Institute Filozofia no Teologia Fatumeta, no seluk tan ne'ebé mak durante ne'e ativu hela.

"Suvensaun públiku ne'ebé ita apoiu ne'e hodi fasilita sira-nia atividade iha universidade atu eleva kualidade edukasaun iha Timor-Leste," Ministru Jerómino hatete.

Nia dehan, suvensaun públiku ne’ebé governu apoiu ba instituisaun ensinu superiór 17 refere ho montante ne’ebé mak diferente hanesan, ensinu superiór 15 hetan $300,000, no iha ensinu superiór rua, Institutu Naroman Esperansa ho Universidade Katólika Timorense, ne'e hetan $200,000-resin, tanba ensinu superiór rua ne'e foin mak hetan lisensa maibé seidauk iha avaliasaun.

"Orsamentu ne’ebé ita apoiu ne'e ita transfere ba faze dahuluk iha pursentu 40% no ba faze segundu nian ita transfere tan 60%," nia informa.

Nia dehan, osan ne'e povu nian, nune'e husu ba kada instituisaun ensinu superiór sira ne'ebé hetan suvensaun tenke iha responsabilidade atu ezekuta ho didi'ak hodi kontribui ba kualidade edukasaun iha rai laran.

"Total orsamentu ne'ebé mak ita apoiu hamutuk 5 milhoens, tanba ne'e husu ba ensinu superiór sira ezekuta tuir akordu ne’ebé mak iha,” dehan Ministru.

Entretantu, reprezentante fundadór sira ba instituisaun ensinu superiór privadu, Agostinho dos santos Gonçalves, agradese ba IX governu konstitusionál, no husu atu nafatin iha kontinuidade ba apoiu ne'e, nune'e bele garante kualidade edukasaun iha Timor-Leste.

"Ha'u lori ami fundadór universidade privadu sira-nia naran, agradese ba IX governu konstitusionál, tanba bele apoiu ona ami. Ami husu atu iha kontinuidade, kona-ba propinas sira ne'e," nia informa.

Nia dehan, atu hadia kualidade edukasaun ne'e importante, tanba ne'e sei nafatin servisu hamutuk ho governu, tanba padraun ba kurríkulu buat sira-ne'e mai husi Governu.

Iha parte seluk, Reitór ICS, Leao Borges, esplika, sira prontu no iha responsabilidade tomak ba apoiu subvensaun públiku husi governu ne'e hodi hadia kualidade edukasaun iha sira-nia institutu rasik.

"Ohin realiza ona akordu, ba oin ne'e ami sei submete ami-nia planu ba atividade sira, primeira faze 40%, depois de ezekuta 40% tenke hatama relatóriu, depois mak ministériu fó tan 60 %. Agora ami preparadu ba planu ezekusaun depois ba oin ita sei haree, orsamentu suvensaun públiku ida-ne'e ami ho responsabilidade tomak atu bele hadia ami-nia instituisaun liu-liu hadia kualidade.

Iha tipu apoiu bara-barak, ida mak oinsá bele hasa'e kualidade liu-liu iha língua portuguesa, nomós fó formasaun ba dosente sira, liu-liu ko’alia kona-ba pedagójika. Pedagójika ne'e signifika métodu ida ne'ebé dosente sira la'o tuir hodi hanorin estudante sira ho di'ak nune'e estudante sira mós akapta saida mak dosente sira fó," nia informa.

Nia informa, iha apoiu ne'e mós ICS sei fó subsidiu ba estudante sira ne'ebé mak iha prestasaun di’ak, inklui mós sei iha ekipa ida ne'ebé sei halo avaliasaun ba dosente sira ne'ebé hanorin ho kualidade ne'e hodi hetan prémiu, kona-ba minimiza prospinas estudante sira-nian, ne'e desizaun husi fundasaun sira, maibé sira sei propoin mós ba fundasaun atu haree mós asuntu ne'e.