Quinta, Junho 13, 2024
Total visitors: 766366

PERMATL ho Ministériu Edukasaun (ME) reativa ona programa to'os eskolár ne’ebé mak durante ne’e paradu komesa husi situasaun Covid-19 mai to'o ohin loron.

Diretór Ezekutivu PERMATL, Ego Lemos, dehan programa to'os eskolár ka laboratóriu moris ne'e hapara provizoriu iha situasaun Covid-19.

Diretór Ezekutivu PERMATL, Ego Lemos, dehan programa to'os eskolár ka laboratóriu moris ne'e hapara provizoriu iha situasaun Covid-19.

"Ohin loron ita halo fali enkontru ho ministeriu edukasaun hodi reativa fali programa to'os eskolár hodi ajuda estudante sira aprende ba hanesan laboratórium moris," nia hatete.

Nia dehan, to'os eskolár ne'e importante tebes hodi eduka estudante sira no jerasaun foun hodi aprende ba, nune'e mós bele kopia fali to'os eskolár ba to'os uma hun hodi kontribui mos ba merenda eskolár.

"Husi to'os eskolár ne'e mós eduka ita-nia komunidade hodi halo sira-nia toos uma hun ho hodi bele apoiu ba merenda eskolár nune'e mós kontribui ba redusaun mal-nutrisaun ba estudante sira," Diretór Lemos dehan iha Mandarin, Díli.

Nia dehan, PERMATL ho Ministériu Edukasaun nafatin esforsu makas hodi fó rezultadu ne’ebé mak di’ak ba reativa implementasau programa to'os eskolár.

Entretantu Ministra Edukasaun Dulce de Jesus Soares dehan, reativa to'os eskolár ne'e la iha politika foun maibé kontinuasaun polítika ne’ebé antes ne'e iha ona.

"Ita reativa de’it nia implementasaun, tanba husi rezultadu hatudu katak programa to'os eskolár ne'e apoiu estudante sira kona-ba konteúdu aihoris no aifuan modo hotu ne’ebé kuda nune'e mós kontribui ba merenda eskolár," nia dehan.

Nia dehan, tuir dadus ne’ebé iha katak husi to'os eskolár antes ne'e implementa iha munisipiu hitu hanesna programa pilotu ne'e iha ona eskola 12 mak kontribui modo ba merenda eskolár. Tanba ne'e programa to'os eskolár ne'e tenke kontinua no mantein nafatin ho nia orijen ne’ebé mak antes ne'e iha no sei la muda.