Quinta, Julho 18, 2024

UNICEF apoiu Ministériu Edukasaun (ME) hodi prepara estudante iha nivel ensinu báziku 5 ano hodi partisipa iha teste edukasuan ne’ebé realiza iha Sudeste Asiátiku iha fulan outubru 2023.

UNICEF apoiu Ministériu Edukasaun (ME) hodi prepara estudante iha nivel ensinu báziku 5 ano hodi partisipa iha teste edukasuan ne’ebé realiza iha Sudeste Asiátiku iha fulan outubru 2023.

Ministra ME, Dulce de Jesus Soares, dehan pela primeira-vés Timor-Leste partisipa iha teste edukasaun nivel Sudeste Asiátiku, tanba ne’e governu husu apoiu UNICEF nian atu bele apoiu preparasaun sira ho materia no seluk tan.

“Timor-Leste partisipa iha teste edukasaun iha ne’e hatudu dezenvolvimentu di’ak mai ita, tanba bele hola parte ona iha teste edukasaun ne’ebé partisipa iha Sudeste Asiátiku,” nia dehan iha Vila-Verde, Díli.

Tanba ne’e ministerio husu apoiu ba UNICEF atu bele apoiu prepara materia ba estudante ensinu báziku sira iha teritóriu laran hodi prepara sira-nia kapasidade no sei halo teste iha nivel distritál, rejionál to’o nasionál mak bele pasa hodi partisipa.

“Husi teste ne’e ita bele haree ita-nia estudante sira-nia rezultadu di’ak ita agradese tebes, se ladun di’ak mós ita nafatin esforsu hodi bele identifika problema sira hodi rezolve,” Ministra Soares dehan.

Tanba ne’e, nia husu ba profesór sira atu akompaña di’ak estudante sira atu bele hatudu rezultadu di’ak iha teste edukasaun nian ne’ebé sei realiza iha fulan outobru.

Entretantu, Reprezentante UNICEF Mitsu Uemura hateten, durante ne’e UNICEF halo ona programa pilotu ba eskola ensinu báziku hamutuk ho estudante hamutuk na’in 1,000 hodi perapara tuir teste iha nivel munisipiu, rejional to’o nasional estudante ne’e iha abilidade di’ak mak pasa hodi reprezenta Timor-Leste iha teste edukasaun iha Sudeste Asiátiku.

“Ita prepara estudante sira la’ós de’it iha área edukasaun, maibé ita prepara mós ba nutrisaun saúde no área seluk tan ne’ebé hola parte iha teste edukasaun ne’e,” nia dehan.

Nia dehan, teste ne’e importante tebes atu bele haree preformansia estudante sira-nian iha 5 ano ensinu báziku nian no oinsa atu bele hadi’ak liutan kualidade edukasaun iha Timor-Leste.

Tanba ne’e UNICEF sei kontinua suporta nafatin ME, tanba teste ne’ebé sei realiza foin primeira-vés hodi Timor-Leste partisipa.

“UNICEF orgullu tebes tanba Timor-Leste hola parte iha aprendizajen asesmentu ida-ne’e,” Reprezentante UNICEF Uemura dehan.

Nia dehan, teste ne’e halo ba nivel ensinu báziku ho razaun presiza tau fundasaun ne’ebé forte iha báziku nune’e ba iha ensinu sekundáriu mós sira preparadu ona.