Quinta, Junho 13, 2024
Total visitors: 766366

Sekretáriu Estadu Komunikasaun Sosial (SECOMS) servisu hamutuk ho UNICEF lansa internet saudável iha eskola hodi fasilita estudante sira aprende iha eskola, nune'e mós hodi kontrolu estudante sira asesu ba sitos ne’ebé mak la merese atu asesu.

Sekretáriu Estadu Komunikasaun Sosial (SECOMS) servisu hamutuk ho UNICEF lansa internet saudável iha eskola hodi fasilita estudante sira aprende iha eskola.

SECOMS Expedito Dias Ximenes dehan, internet saudável ne'e Lansa ho objetivu hodi fasilita estudante sira asesu matéria ne’ebé profesór sira fahe bele estuda iha uma ba eskola mak halo diskusaun.

"Atu kontrola estudante sira labele asesu ba sitos ne’ebé la di’ak mak SECOMS servisu hamutuk ho operadór telekomunikasaun sira hodi kontrolu liuhusi internet katak bele utiliza de’it asesu ba materia sira, no sitos ne’ebé la di’ak sei la autoriza," nia dehan.

Tanba ne'e nia dehan, SECOMS servisu hamutuk ona ho UNICEF hodi lansa internet saudável iha eskola hodi fasilita estudante sira aprende iha uma.

"Ita fiar katak internet ne'e bele hetan kontrolu diak liu husi operador telekomunikasaun sira hodi tulun estudante sira iha eskola nune'e mos uza tuir akordu ne’ebé mak estabelese ona," SECOMS Dias dehan iha Kaikoli.

Enkuantu, kontrolu kona-ba internet ne'e ba utilizasaun estudante sira, SECOMS servisu hamutuk ho TIC Timor(Tecnologias de Informação e Comunicação) tanba sira iha ekipamentu no kapasidade natoon hodi kontrolu kona-ba utilizasaun internet, ba iha sitos ida ne’ebé merese duni ba estudante sira.

Iha parte seluk, Profesór Serafim da Costa husi Eskola Ensinu Báziku Filial Samoro Soibada dehan, espera katak internet ne’ebé fasilita husi SEKOMS ho UNICEF ne'e saudável duni ba estudante nune'e bele tulun ona inan-aman sira gasta osan sosa pulsa ba estudante sira asesu internet.

"Ita mós husu autodidade liga ho servisu operadór sira atu kontrolu liuhusi meiu saida de’it ne’ebé estudante sira labele asesu ba filmajem ladi’ak sira atu nune'e konsentrasaun utilizasaun ba de’it materia nain," nia dehan.

Enkuantu nia dehan, iha eskola mós profesór sira sei esforsu makas hodi kontrolu, maibé husu mós ba inan-aman sira bele kontrola iha uma atu nune'e estudante sira labele utiliza sala internet refere.