- Publika iha: 07 Setembro 2023
Prezidente Repúblika Jose Ramos Horta dehan governu Timor-Leste tenke tau atensaun ba asuntu hadia saláriu profesór sira, tanba profesór barak mak dedika sira-nia an ba dezenvolvimentu edukasaun iha rai laran maske ho saláriu ne’ebé ki'ik tebes.
"Ha’u husu beibeik ba governu favór tau matan ba profesór sira hadia polítika hasa'e saláriu ba sira hodi valoriza sira-nia kontribuisaun matenek ne’ebé durante ne'e sira iha hodi transmite siénsia ba estudante sira hodi prepara ba nasaun nia futuru," nia sujere.
Nia dehan, hadia polítika saláriu ne'e la’ós ba deit profesór ensinu báziku sira maibé tenke to'o iha ensinu superiór públiku no privadu ne'e mak durante ne'e hala'o nia atividade hodi transforma foinsa'e sira.
"Profesór ensinu superiór privadu sira, mesmu privadu maibé governu tenke haree oinsa bele tulun sira, tanba profesór universitariu balun manan de’it $300 dolar," Prezidente Horta dehan.
Tanba nia dehan, situasaun hirak ne'e akontese tanba sala iha kria polítika sira, tanba ne'e governu iha kompeténsia tomak hodi hadia.
Entretantu, Ministra Ministerio Edukasaun (ME), Dulce de Jesus Soares, dehan ministériu karuka ona lista profesór hamutuk na’in 10,000 sei hetan kareira espesial no na’in 4,000 kontratadu promove ba permanente.
"Ami haruka ona dokumentu ba Komisaun Funsaun Públika atu bele hasa'e sira-nia saláriu liuhusi kareira espesial ne’ebé ita promove, nune'e mós kontratadu ba permanente," nia dehan.
Nia dehan durante ne'e ministériu edukasaun esforsu makas hodi hadia saláriu ba profesór sira hahu husi pre-eskolár to'o ensinu sekundariu ne'e liuhusi promove sira husi voluntáriu ba kontratadu no ba permanente.
"Kona-ba rekomendasaun sira husi Xefe Estadu nune'e mós organizasaun sira kona-ba aumenta saláriu ba profesór ne'e ita enkaixa hotu no sei buka meiu hodi kria polítika ka lei ruma atu bele hadia diak liutan saláriu ba profesór," Ministra Edukasaun Soares dehan.
Tanba ne'e nia dehan, sujestaun hotu governu konsidera, tanba dezenvolvimentu setór edukasaun presiza ema hotu nia kontribuisaun tantu ideia no materiál.