Quinta, Julho 18, 2024

Ministériu Edukasaun (ME) kontinua husu apoiu husi ajénsia Nasoens Unidas (UN) ba apoiu implementasaun programa merenda eskolár, nune'e mós dezenvolve kurríkulu pre-eskolár no ensinu báziku nian.

Ministra Edukasaun, Dulce de Jesus Soares, dehan durante ne'e koperasaun entre governu Timor-Leste no ajénsia UN ne'e di’ak tebes no sira apoiu ona área barak iha edukasaun.

Ministra Edukasaun, Dulce de Jesus Soares, dehan durante ne'e koperasaun entre governu Timor-Leste no ajénsia UN ne'e di’ak tebes no sira apoiu ona área barak iha edukasaun.

Nia hatete, apoiu ne’ebé mak sira halo durante ne'e hanesan apoiu dezenvolvimentu formasaun profisionál profesór,nune'e instalasaun bee moos ba eskola sira ne’ebé la iha bee.

"Ita kontinua husu ba ajénsia Nasoens Unidas (UN) hodi apoiu devenvolvimentu implementasaun programa merenda escolar, nomós kurríkulu pre-eskolár no ensinu báziku nian," Ministra Soares dehan.

Nia dehan, atu dezenvolve kurríkulu eskolár sira presiza opiniaun ka ideia husi ajénsia no parseru sira ne’ebé mak durante ne'e servisu hamutuk ho ministériu edukasaun hodi halo avaliasaun ba kurríkulu anteriór nune'e bele haree iha parte ida ne’ebé mak presiza hasai no ida ne’ebé presiza hadia no aumenta.

Enkuantu nia dehan, kurríkulu pre-eskolár no ensinu báziku ne’ebé durante ne'e utiliza implementa iha tinan 2015 no to'o ohin loron seidauk halo revizaun hodi identifika nia lakuna sira.

"Ita presiza tebes opiniaun husi parseru internasionál no nasionál sira-nian atu bele hadia kurríkulu ne'e rasik," nia salienta.

Iha fatin hanesan, Koordenadora Rezidente UN iha Timor-Leste, Funmi Balogun, hatete UN ho Ministériu Edukasaun ko’alia ona kona-ba oinsa mak UN bele kontinua fó apoiu.

"Durante ne'e programa barak mak ami hala'o ona iha área edukasaun hahú husi nivel báziku to'o sekundáriu, ami nafatin kontinua apoiu ministériu edukasaun," nia informa.