- Publika iha: 15 Agosto 2023
Escola Ensinu Báziku Sentrál (EBC) Calma Uatuquila iha suku Bibileo, Postu Viqueque Vila, Munisípiu Viqueque, iha tempu udan profesór sira hapara prosesu aprendizajen tanba kondisaun eskola la di’ak.
Koordenadór EBC Calma Uatuquila, Fransisco Gomes, dehan sira ni’an escola konstrui iha tinan 2012 ho saladeaulaneen (6) no eskola refere dadaun ne'e kondisaun aat ona.
"Bainhira tempu udan ita hapara provizóriu prosesu aprendizajen, tanba kalen eskola no didin sira aat hotu ona, nune'e mós, eskola refere iha mota rua nia klaran no risku tebes estudante nia vida bainhira udan," nia dehan.
Nia dehan, rai iha eskola nia sori-sorin ne'e monu hotu ona, tanba mota sobu nune'e mos ponte atu hakat mota la iha,tanba ne'e kuandu udan eskola deside feriadu ba estudante sira bele hakmatek iha uma.
"Ami sempre halo karta ba governu liu-liu Ministériu Edukasaun, maibé dehan hein de’it atu hadia infraestrutura eskola, nune'e mos muda eskola ba fatin seluk. Maibé to'o agora seidauk iha rezultadu, tanba ne'e ami aguenta utiliza de’it ba prosesu aprendizajen iha tempu loron, tempu udan la eskola," Koordenadór EBC Calma Gomes dehan.
Tanba ne'e nia dehan, durante ne'e meiu ne'ebé sira halo ba estudante sira bainhira tempu udan estuda iha uma de’it.
"Ita-nia eskola ne'e totál estudante hamutuk na’in 78 kompostu husi primeiru anu to'o sestu anu no profesór na’in-3 permanente na’in-1 no kontratadu na’in-2 mak durante ne'e hanorin," nia dehan.
Nia dehan, maské eskola ho kondisaun la di’ak no risku loos husi mota maibé profesór sira la lakon vontande hodi fo korajen ba estudante sira nafatin eskola hodi asesu ba edukasaun ne’ebé di’ak.
Entretantu, estudante AG dehan, durante ne'e iha tempu udan sira tuir prosesu aprendizajen sente la seguru, tanba tauk mota nune'e mós uma atu monu hanehan sira.
"Profesór sira halo enkontru ho ami nia inan aman hodi deside katak tempu udan feriadu de’it no estuda iha uma, la presiza mai eskola," nia dehan.