Terça, Maio 21, 2024
Total visitors: 766366

Governu Korea seiu destaka espesialista ho voluntáriu hodi apoiu Ministériu Edukasaun Juventude no Desportu (MEJD), hodi hadia kualidade edukasaun iha Timor-Leste.

 

Governu Korea seiu destaka espesialista ho voluntáriu hodi apoiu Ministériu Edukasaun Juventude no Desportu (MEJD), hodi hadia kualidade edukasaun iha Timor-Leste.

Embaxadór Korea iha Timor-Leste, Shin Mantaek dehan durante ne’e Korea apoiu Timor-Leste iha área tolu, Edukasaun, Saúde no Administrasaun, enkuantu iha edukasaun nian foka liuba merenda eskolár, nune’e mós sanitária.

“Ami koopera ona ho MEJD hodi destaka espesialista balun husi Korea ho voluntáriu hodi apoia ba hadia kualidade edukasaun iha Timor-Leste liuhusi kapasitasaun rekursu humanu ba manorin nain sira,” nia hatete.

Nia dehan, nasaun Korea sai dezenvolvidu ho fator determinante ida mak edukasaun, tanba ne’e mak koko atu replika esperiénsia ne’ebé iha fahe ba Timor-Leste atu apoiu hasa’e kualidade ensinu.

“Liu husi destaka epesialista sira ho voluntáriu ne’e hodi identifika apoiu saida mak sai nesesidade hodi hadia kualidade edukasaun, aleinde ne’e iha mós kapasitasaun ba manorin nain sira,” Embaxadór Mantaek dehan iha MEJD.

Iha fatin hanesan, Ministra Ministerio Edukasaun Juventude no Desportu (MEJD), Dulce Soares dehan dadaun ne’e MEJD ho governu Korea iha ona koordenasaun di’ak kona-ba oinsá hadia kapasitasaun manorin sira-nian.

“Ita espera katak liuhusi kooperasaun ne’ebé Ministériu Edukasaun halo ho Governu Korea hodi destaka espesialista sira kona-ba edukasaun nian atubele apoiu dezenvolve kualidade edukasaun,” nia dehan.

Nia dehan, espesialista sira-ne’e sei destaka iha ministériu, nune’e mós eskola sira ne’ebé identifikadu hodi halo dezenvolvimentu ba edukasaun ho kualidade.

“Atu hadia kualidade edukasaun governu mesak labele, maibé presiza mós tulun husi parseru internasionál sira liu-liu nasaun sira ne’ebé mak iha nia sistema edukasaun ne’e avansadu tebes,” Ministra Soares dehan.

Enkuantu nia dehan, Governu Korea la’ós foin apoiu Ministériu Edukasaun, maibé antes ne’e apoiu ona Sentru Nasionál Imprensaun hodi imprimi livru sira ne’ebé distriui ba eskola iha territóriu laran, nune’e apoiu programa merenda eskolár no sanitasaun.