TLCE Husu MEJD Finaliza Lalais Projetu Komunitáriu

Rede Edukasaun Timor-Leste Coalition for Education (TLCE) husu Ministériu Edukasaun Juventude no Desportu (MEJD) finaliza lalais projetu komunitáriu sira tanba projetu refere implementa kuaze tinan 4 oan.

Koordenadór TLCE, Jose Monteiro, dehan projetu komunitáriu refere implementa ba eskola hamutuk 200 iha territóriu laran, maibé eskola hirak ne’e la’ós konstrusaun foun hotu, balun halo reabilitasaun de’it.

Nia dehan, tarjetu hodi finaliza projetu komunitáriu ne’e to’o de’it iha tinan 2022 maibé to’o ona tinan 2023 projetu ida-ne’e seidauk bele finaliza, no nia husu oinsá bele realiza fali programa prioridade seluk hodi dezenvolve setór edukasaun.

“Ita husu atu Ministériu Edukasaun Juventude no Desportu (MEJD) atu aselera lalais projetu komunitáriu tanba kuaze tinan barak ona,” TLCE Monterio dehan.

Nia dehan, dezenvolvimentu setór edukasaun la’ós haree de’it ba infarestrutura, maibé iha parte barak, hanesan, formasaun professór ba área hotu tantu língua, nune’e mós teknolojia.

“Infaestrutura eskola di’ak tiha, mak formasaun professór menus ida-ne’e mós fó impaktu ba dezenvolvimentu kualidade edukasaun, tanba ne’e ita husu atu aselera lalais konstrusaun eskola 200 iha territóriu laran ne’e mak tama ba projetu komunitáriu,” nia husu.

Entretantu, Xefe Departamentu Projetu Komunitáriu iha MEJD Alfredo Mali-Ati Gama hatete, eskola 200 ne’ebé mak tama iha projetu komunitária ne’e maioria finaliza ona nia konstrusaun, minoria mak seidauk.

“Ita iha eskola 59 mak seidauk finaliza nia konstrusaun ho razaun katak labele asesu ba estrada, maibé governu esforsu hodi bele transporta material sira ba to’o eskola no dadaun ne’e prosesu kontrusaun la’o hela,” nia salienta.

Enkuantu nia dehan, ba eskola sira ne’ebé governu entrega ona husu ba komunidade eskolár sira atu kuidadu fasilidade sira nune’e bele utiliza iha tempu naruk.

Iha parte seluk Diretór Edukasaun Munisípiu Aileu Miguel Moniz Pires dehan, iha Aileu eskola ne’ebé tama ba rojetu komunitáriu hamutuk 13 kompostu husi pre eskolar rua, seluk ensinu báziku no sekundáriu jerál.

“Eskola neen (6) mak ita finaliza ona nia konstrusaun ne’e maioria ensinu báziku de’it falta eskola hitu mak ita seidauk finaliza nia konstrusaun,” nia hatete.

Nai dehan, eskola hitu (7) ne’e mós sei finaliza iha tempu badak no sei entrega ba koordenadór eskola sira hodi bele utiliza.