Produsaun Agrikola Menus Fo Impaktu Ba Merenda Eskolár

Prezidente Autoridade Munisípiu Manufahi, Arantes Isac Sarmento, dehan dadaun ne’e produsaun agrikola iha munisípiu refere menus no ida ne’e fó impaktu ba programa merenda eskolár tanba menu ne’ebé iha tenke ho produtu lokál.

Nia dehan, programa merenda eskola ne’e lansa ona iha fulan fevereiru ne’e, no osan mós husi munisípiu aloka ona ba kada eskola hodi realiza maibé nia problema mak menus produtu lokál.

“Produsaun husi ita-nia agrikultór sira menus tanba iha ligasaun ho mudansa klima ne’ebé mak iha, dalaruma la ajuda ita-nia agrikukltór sira atu oferese produtu lokál ba merenda eskolár,” nia dehan iha Kaikoli.

Nia dehan, programa merenda eskolár ne’e kuaze eskola hotu ne’ebé implementa merenda eskolár ne’e tuir menu produtu lokál, maibé lokál ne’ebé tama ne’e sei menus hela labele kobre ba eskola hotu.

“Liga produsaun produtu lokál ne’ebé mak menus husi agrikultór sira impaktu ba implementasaun mereda eskolár iha munisípiu Manufahi rasik,” PAM Manufahi Isac dehan.

Maibé nia dehan, husi parte eskola no munisípiu nafatin halo aprosimasaun ho agrikultór sira atu bele hasa’e produsaun nune’e bele oferese ba eskola hodi realiza programa merenda eskolár tuir orasmentu ne’ebé mak iha.

“Ita lakohi sosa buskuit ba estudante sira, ita lakohi sosa ayam potong ba ita-nia estudante sira, maibé ita esforsu hodi oferese produtu lokál hanesan, ikan nune’e mós manu tolu, naan karau sira no modo tahan, menu seluk tan ne’ebé mak oferese,” nia hatete.

Enkuantu totál orsamentu ba merenda eskolár tinan ida-ne’e iha munisípiu Manufahi hamutuk rihun $100 ital, distribui ba eskola hamutuk 57, eskola ne’ebé mak implementa programa merenda eskolár ne’e hamutuk eskola 16 no total estudante benifisiária hamutuk na’in 1,000.

Entretantu, Koordenadór Rede Edukasaun Timor-Leste Caolition for Education Jose Monteiro dehan, merenda eskolár ho produtu lokál ne’e di’ak tebes ba estudante sira liu-liu hahan sira ne’ebé bele hadia nutrisaun no aumenta sira-nia abilidade.

“Maibé problema mak ita-nia produsaun menus, nune’e mós kona-ba ema sira ne’ebé mak hakiak ikan ne’e mós menus iha munisípiu balun de’it mak ema haki’ak ikan iha balun la iha,” nia dehan.

Nia dehan, fiar katak ho menu sira ne’ebé la iha ne’e husi parte eskola sei halo esforsu atu bele troka fali ho menu seluk hanesan, naan karau, sira mantolun no naan fahi sira.