- Publika iha: 11 Maio 2023
Eskola hamutuk atus ida (100) resin iha Munisípiu Ermera to’o agora seidauk implementa programa merenda eskolár tanba seidauk hetan kódigu vendór husi Ministériu Finansas.
Prezidente Autoridade Munisípiu Ermera, Eusebio Salshina, dehan eskola sira atu implementa programa merenda eskolár tenke bazeia ba kódigu vendór ne’ebé mak Ministériu Finansas prepara ona, tanba kódigu vendór ne’e matan dalan hodi utiliza orsamentu.
“Eskola 100 kompostu husi bázika no filial sira iha Munisípiu Ermera seidauk implementa programa merenda eskolár,” nia salienta iha Gleno.
Nia dehan, kona-ba orsamentu ba merenda eskolár ba eskola 100 iha Ermera hamutuk millaun 2 dolar amerikanu no kada eskola nia montente la hanesan tanba bazeia ba númeru estudante sira.
“Orsamentu millaun 2 ne’e ita transfere ona ba iha eskola sira antes ne’e maibé seidauk bele implementa tanba la iha kódigu vendór,” PAM Salsinha informa.
Tanba ne’e nia dehan, dadaun ne’e husi parte munisípiu no eskola sira hein hela Ministériu Finansas atu bele fó ona kódigu vendór ne’e atu bele implementa programa merenda eskolár hodi bele fasilita estudante sira han iha eskola tanba iha munisípiu Ermera maioria estudante sira hela do’ok husi eskola.
“Espera katak iha dia 6 agora ita bele lansa ona programa merenda eskolár iha eskola hodi fasilita ita-nia estudante sira,” nia informa.
Entretantu Koordenadora Eskola Munisipál Ermera Vila, Apalonia de Jesus Pereira, dehan iha primeiru períodu ne’e sira la implementa programa merenda eskolár ba estudante sira tanba osan tama tarde nune’e mós la iha livru matadalan osan nian.
“Total osan ne’ebé ita hetan ba programa merenda eskolár hamutuk $4,000 resin ho totál benefisiariu na’in 457 ne’e ba segundu trimestre nian,” nia informa.
Tanba ne’e nia dehan, ba implementasaun programa merenda eskolár ba segundu períodu nian ne’e sei lansa bainhira hahú aula segundu trimestre nian.