ISFIT Fo Oportunidade ba Ema Hotu Bele Asesu

Institutu Superior Filosofia no Teologia (ISFIT) Fatumeta, Dili, la’os deit ba seminarista no diakonu no padre sira maibe fo oportunidade ba ema hotu inklui mos husi religiaun seluk mos bele ba asesu ba nivel ensinu superior iha ISFIT.

Reitor ISFIT, Padre Justino Tanec, dehan sira hambrik ho fakuldade rua Filosofia no Teologia, antes ne’e laloke ba publiku maibe depois de hetan akreditasaun iha 2020 ho nune’e deside hodi loke ba publiku bele asesu no la iha diskriminasaun.

“ISFIT fo oportunidade ba ema hotu bele asesu tantu husi religiaun seluk mos bele ba asesu hodi aprende konaba filosofia no teologia hamutuk ho padre, seminarista nune’e mos leigu feto no mane,” nia dehan.

Nia hatete, ida ne’e sai hanesan riku soin bo’ot ida ba ISFIT hodi aprende konaba lia los, konaba pensamentu kritiku nune’e mos aprende konaba fiar.

“Estudante sira ne’e hanesan riku-soin ne’ebe ami iha hodi ofrese ba igreija nune’e mos ba nasaun Timor,” Reitor Padre Tanec informa.

Enkuantu nia dehan, durante ne’e ISFIT nia estudante maioria mane deit maibe, ba graduasaun etapa ba dala toluk ne’e iha feto nain neen (6).

Entretantu, estudante Loginson da Conseicao Verdial dehan, ISFIT la’os hanorin deit estudante sira konaba siensia maibe hanorin mos konaba fiar moral no oinsa atu moris iha sosiedade ka familia.

“Sistema hanorin iha ISFIT ita bele dehan, katak uniku tebes, tanba durante ami la aprende deit ba siensia maibe ami aprende oinsa servi Maromak moris iha paz,” nia dehan.

Tanba ne’e, nia husu ba maluk joven sira prende hamutuk iha ISFIT atu nune’e bele prepara an ba futuru sai joven ne’ebe diak ba nasaun nune’e mos ba Igreja.