- Publika iha: 26 Abril 2023
Governu liuhusi Ministériu Edukasaun Juventude no Desportu (MEJD) finaliza ona konstrusaun eskola hamutuk 59 ne’ebé tama iha projetu komunitáriu iha munisípiu Bobonaro.
Ministru MEJD, Armindo Maia, hatete eskola ne’ebé hatama proposta ba iha projetu komunitáriu hamutuk 99 ne’ebé identifika iha tinan 2020.
"Husi eskola 99 ne'ebe mak tama iha projetu komunitáriu ne'e ita finaliza ona eskola hamutuk 59, seluk sei iha prosesu konstrusaun," nia dehan.
Nia dehan, eskola hamutuk 59, kategoria rehabilitasaun 1 no konstrusaun foun hamutuk 58 kompostu husi saladeaula 191, haris fatin 36, kuzina 8, eskritóriu profesór 21, no laboratóriu 2.
"Totál orsamentu ne’ebé ita ezekuta hamutuk millaun 6.4," Ministru Maia dehan.
Nia dehan, MEJD Kontinua halo esforsu tomak hodi kompleta obra sira-ne’ebé seidauk finaliza iha territóriu laran tomak.
Enkuantu nia dehan, eskola ne’ebé tama ba projetu komunitáriu iha territóriu laran tomak hamutuk 228 maioria finaliza ona falta eskola 70 mak seidauk finaliza.
Entretantu, Koordenadór Rede Edukasaun Timor-Leste Coalition for Education (TLCE), Jose Monteiro dehan projetu komunitáriu ne'e kleur ona maibé seidauk konkliu.
"TLCE husu atu Ministériu Edukasaun Juventude no Desportu atu konklui lalais projetu komunitáriu ne'e tanba dezenvolvimentu edukasaun la’ós de’it iha infraestrutura maibé tenke fó importánsia mós ba formasaun profesór," nia dehan.
Nia dehan, tenke fó mós importánsia ba formasaun profesór sira kona-ba matéria espesífiku sira atu nune'e bele hasa'e kualidade edukasaun iha Timor-Leste.