Sexta, Março 01, 2024
Total visitors: 766366

Estudante hamutuk na’in 223 iha territóriu laran mak sai ona benefisiáriu ba programa bolsa parsiál hodi asesu ba ensinu superiór privadu no públiku.

Diretór Ezekutivu Fundu Dezenvolvimentu Kapital Humanu (FDCH), Cristovão dos Reis, dehan programa bolsa parsiál ne’e ho objetivu hodi finansia sira-nia estudu to’o finaliza.

Diretór Ezekutivu Fundu Dezenvolvimentu Kapital Humanu (FDCH), Cristovão dos Reis, dehan programa bolsa parsiál ne’e ho objetivu hodi finansia sira-nia estudu to’o finaliza.

“Iha tinan 2023 ne’e estudante ne’ebé ita rejistu sai benefisiáriu ba bolsa parsiál hamutuk na’in 223 iha territóriu laran tomak, estudante hirak ne’e ita apoiu de’it ba kustu propinas to’o remata,” nia dehan.

Nia dehan, FDCH apoiu de’it kustu propinas maibé kona-ba kustu nesesidade no alojamentu ne’e inan-aman mak responsabilidade rasik.

“Totál kandidatu ne’ebé ita rejistu jamutuk na’in 763 depois halo selesaun iha de’it estudante na’in 223 mak sai benefisiáriu ba programa bolsa hakbit ne’e rasik,” nia dehan.

Enkuantu nia dehan, estudante bolsa parsiál sira-ne’e koloka iha instituisaun ensinu superiór públiku inklui iha Universidade Nacional Timor Lorosa’e (UNTL), Institutu Politékniku Betanu (IPB) nune’e mós Universidade da Paz (UNPAZ), Díli Institute of Teknology (DIT), Univeridade Timor Oriental (UNITAL), no Universidade Díli (UNDIL).

“Estudante bolsa parsiál hirak ne’e ita koloka de’it iha fakuldade importante sira hanesan, Enjeñaria, Saúde, Agrikultura, Direitu no Tékniku Indústria,” nia dehan.

Enkuantu nia dehan, kada benefisiáriu sira-ne’e hetan direitu ba osan ho montante $150 ne’e kada semestre.

Entretantu, benefisiária Olinda Maria Gorete dehan, programa governu nia bolsa parsiál ne’ebé ajuda nia hodi asesu iha ensinu superiór tanba inan-aman la iha kbit atu selu nian eskola.

“Maibé liuhusi programa bolsa parsiál ha’u bele eskola no kona-ba nesesidade lor-loron nian inan-aman no família sira mak responsabilidade. Ha’u agradese tebes ba oportunidade ida-ne’e,” nia hatete.

Tanba ne’e nia dehan, liuhusi programa bolsa parsiál ne’e mak fasilita nia kontinua estudu iha fakuldade Enjeñaria Siénsia no Teknolojia iha UNTL.