Sexta, Março 01, 2024
Total visitors: 760811

Prezidente Repúblika (PR) Jose Ramos Horta husu governu tenke kria universidade iha área rurál sira atu bele fasilita komunidade asesu nune’e lebele mai hotu iha kapital Díli.

Prezidente Repúblika (PR) Jose Ramos Horta husu governu tenke kria universidade iha área rurál sira atu bele fasilita komunidade asesu nune’e lebele mai hotu iha kapital Díli.

Nia dehan, iha rurál hirak ne’e nia klima fresku tebes hakmatek kontribui tebes ba estudante universitáriu sira hodi aprende ho di’ak nune’e bele halo mundansa iha área rural sira nune’e mós fó benefisiu ba komunidade.

“Governu tenke kria universidade iha área rurál hanesan Baucau, Laklubar, Same, no Aileu atu fasilita komunidade edukativa sira fasil hodi asesu ba iha nivel ensinu superiór, nune’e mós parte ida halo dezenvolvimentu iha área rurál,” Prezidente Horta hatete iha serimónia solene graduasaun UNTL foin lais iha CCD, Dili.

Nia dehan, ezemplu iha nasaun balun, universidade no komunidade estundantíl, akadémika iha área rurál realiza atividade ekonomia, jere empregu halo produsaun no fó benefisiu ba komunidade rurál.

“Governu kria Universitáriu Aileu ne’e kapas tebes, atu bele estudante sira estuda teoria hotu tenke prátika kedan nune’e bele lori benefisiu ba komunidade rurál hanesan no nasaun seluk, no ita fiar katak Timor-Leste mós bele tanba tempu to’o ona atu lori universidade ba iha rejionál,” Prezidente Horta dehan.

Nia dehan, banhira lori ona universidade ba iha área rurál redús ona estudante universitáriu iha Díli nune’e mós ajuda ona inan aman balun ne’ebé mak la iha kbiit haruka ona sira mai eskola iha Díli, sira bele asesu universidade iha munisípiu rasik.

“Bainhira kria Universidade tenke kompleta ho biblioteka, kampu desportivu, jardin, sentru saúde, kantina eskolár ne’ebé mak nutrisaun di’ak no bee moos saneamentu atu estudante sira bele estuda ho kondisaun saudável ita tenke kompleta ho materiál lokál nune’e mós materiál produsaun Timor-Leste nian bazeia ba klima ita-nian,” Prezidente Horta salienta tan.

Aleinde ne’e husu estudante no joven sira tenke aprende lian seluk husi lian ofisiál Tetun no Portugés, tanba ne’e nia dehan, lian Inglés ne’e importante tebes hodi fasilita komunikasaun iha mundu, liuhusi siénsia teknolojia, medisina no komérsiu internasionál nune’e mós lian seluk tan.

Entretantu, Ministru Ministeriu Edukasaun Ensinu Supeior, Siénsia no Kultura (MESSK) Longuinhos dos Santos dehan, planu kria universidade iha munisípiu ne’ebé mak potensiál ne’e oitavu governu nian ho objetivu katak hasa’e ekonomia iha área rurál.

“Husi planu ida-ne’e ita konsegue kria Sidade Universitáriu Aileu tanba fatin ne’ebé hakmatek no fó konsentrasaun ba alin estudante sira atu bele halo estudu ho di’ak, nune’e mós ho hanoin ida katak estudante hotu labele movimentu iha sidade Díli de’it maibé tenke desentraliza iha munisípiu,” nia hatete.

Aleinde ne’e nia dehan, iha mós planu sei harii politékniku sira liu-liu promosaun ba setór turizmu iha Lospalos, Baucau, Viqueque, nomós prepara ema ba kuadru petrolífeiru nian iha kosta-sul, programa hirak ne’e tau ona iha planu perioridade VIII governu nian maibé lakonsegue no fiar katak governu foun mai bele kontinua fali programa importante ne’ebé mak lori dezenvolvimentu ba komunidade rurál.