Estudante Na’in 3.333 Sai Ona Benefisiáriu ba Programa Bolsa Hakbit

Estudante na’in 3.333 mak durante ne’e sai ona benefisiáriu ba programa bolsa hakbit ne’ebé implementa husi Fundo Desenvolvimento Capital Humano (FDCH) hodi asesu ba ensinu superiór.

Diretor Ezekutivu FDCH, Cristovão dos Reis dehan, programa bolsa hakbit ne’e governu liuhusi FDCH hodi tulun estudante ne’ebé inan-aman vulnerável liu no la iha kbiit atu suporta oan sira ba eskola no hodi bele asesu ba ensinu superiór iha rai-laran.

“Durante ita implementa programa bolsa hakbit hahú husi tinan 2019 mai to’o 2023 ne’e ita iha estudante hamutuk na’in 3.333 mak sai ona benefisiáriu ba programa refere,” Diretór Reis dehan iha CCD.

Enkuantu nia dehan, estudante sira-ne’e koloka ba iha ensinu superiór privadu no públiku hamutuk 14 ne’ebé akreditadu iha Timor-Leste.

“Benefisiáriu bolsa hakbit sira governu mak apoiu sira eskola ho gratuitu hahú husi nivel Diploma III to Lisensiatura,” nia hatete.

Nia dehan, estudante bolseriu sira ba programa bolsa hakbit ne’e balun konsegue finaliza ona sira-nia estudu no servisu ona iha instituisaun públiku no privadu sira, no balun oras ne’e dadaun hala’o hela estudu.

“Ita husu ba estudante sira atu aproveita didi’ak oportunidade ne’e atu nune’e bele fó rezultadu di’ak ba governu nune’e mós família, nune’e husu atu sai ezemplu ba estudante seluk iha eskola,” Diretór FDCH Reis husu.

Iha fatin hanesan, Benefisiáriu Yonelho Filhos de Deus agradese ba governu tanba bele kria ona programa bolsa hakbit hodi tulun estudante ne’ebé mak vulnerável liu hodi kontinua iha universidade.

“Liuhusi programa bolsa hakbit ne’e mak ohin loron ha’u bele kontinua ha’u-nia estudu iha Universidade da Paz (UNPAZ), iha Fakuldade Enjeñaria,” nia dehan.

Nia hatete, bainhira governu la kria programa bolsa hakbit nia labele kontinua nia estudu tanba inan-aman la iha kbiit ekonomia atu nia bele eskola.

Tanba ne’e kontinua husu ba governu atu bele identifika estudante ne’ebé mak inan-aman vulnerável liu hodi bele enkaixa iha programa ida-ne’e atu sira mós bele iha oportunidade asesu ba edukasaun hanesan no ema seluk.