- Publika iha: 14 Abril 2023
Profesór idade reforma hamutuk na’in 2.060 mak dadaun ne’e kontinua ativu hanorin iha eskola tanba Ministériu Edukasaun Juventude no Desportu (MEJD) presiza nafatin sira-nia kontribuisaun ba dezenvolvimentu edukasaun iha Timor-Leste.
Ministru MEJD, Armindo Maia dehan dadaun ne’e identifika ona profesór idade reforma hamutuk na’in 2.060 governu nafatin fó oportunidade ba sira hodi hanorin nune’e mós akompaña husi profesór foinsa’e sira atu nune’e bainhira sira hakarak reforma profesór foinsa’e sira priense kedas.
“Ita-nia profesór na’in 2.060 ne’e balun idade tama reforma, balun idade liu ona reforma maibé ativu hela iha eskola aleinde ita presiza hela sira-nia kontribuisaun nune’e mós lei funsaun públika la obriga profesór sira tenke reforma,” Ministru Maia dehan.
Nia dehan, iha lei reforma la obriga sira atu ba reforma maibé tenke liuhusi vontade no hakarak rasik la obrigátoriu.
“Se sira hakarak reforma sira mak tenke hatama karta, depois Ministériu Edukasaun Juventude no Deportu bele prosesu ba Komisaun Funsaun Públiku hodi reforma,” nia dehan.
Aleinde ne’e nia dehan, profesór nia idade reforma ona maibé fizikamente sei di’ak hodi bele transforma siénsia ba estudante sira, lei fó dalan nafatin bele ativu hodi hala’o knaar hanesan profesór.
“Total ita-nia profesór dadaun ne’e permanente iha na’in 10.053, kontratadu iha na’in 5.203,” nia informa.
Iha parte seluk Koordenadór Ensinu Báziku Filial (EBF), Rama-Hana Jose da Costa, dehan husi sira nia eskola iha profesór na’in 5 mak hanorin durante ne’e, na’in 3 kontratadu, na’in 2 mak permanente maibé idade reforma hotu ona.
“Idade reforma ne’e mak ha’u rasik, hanesan koordenadór eskola nune’e mós profesór, ho ha’u-nia profesór ida. Ami hatama ona karta reforma ba gabinete MEJD maibé seidauk responde tanba ne’e mak ami kontinua ativu iha eskola,” nia dehan.
Nia dehan, bainhira sira-na’in rua reforma MEJD tenke kompleta kedas ho profesór ba eskola refere nune’e estudante sira labele iha difikuldade hodi asesu ba materia.