Komisaun G Husu MEJD Atribui Bolsa Meritu Ho Lolos

Komisaun G, trata Asuntu Edukasaun no Arte no Kultura iha Parlamentu Nasional, husu Ministeriu Edukasaun Juventude no Desportu (MEJD) hodi atribui bolsa meritu ho lolos ba estudante sira ne’ebe mak hetan valor diak iha ezame final tinan akademiku 2022 nian.

Prezidente Komisaun G, Deputadu Antonio Verdial, dehan programa bolsa meritu ne’e governu kria hodi fo bolsa estudu ba estudante sira ne’ebe hetan valor bo’ot iha ezame nasional hodi valoriza sira nia matenek nune’e ba oin bele enkoraja nafatin sira hodi estuda no mantein ho matenek ne’ebe iha.

“Ita husu MEJD atribui bolsa meritu ne’e lolos ba estudante ne’ebe mak merese duni, labele fo arbiru atu familia ka se deit,” Deputadu Verdial dehan iha Parlamentu Nasional, Dili.

Tanba ne’e nia dehan, iha ona informasaun balun katak programa bolsa meritu ne’e mosu ona manipulasaun barak ba estudante sira iha eskola.

“Ita simu lamentasaun barak husi komunidade iha teritoriu laran katak implementasaun programa bolsa meritu ne’e atribui lalos tanba estudante ne’ebe hetan valor bo’ot la iha direitu ba bolsa meritu, maibe estudante ne’ebe valor ki’ik naran iha fali,” Prezidente Komisaun G Verdial informa.

Tanba ne’e, nia husu governu no MEJD tenke tau atensaun ba implementasaun bolsa meritu atu nune’e labele hamosu manipulasaun ba estudante sira.

Iha parte seluk Diretor Jeral Edukasaun no Ensinu iha MEJD, Luis Manuel da Costa Fernandes dehan, dados estudante sira ne’ebe mak sai benefisiariu ba programa bolsa meritu ne’e husi eskola mak enkaminha ba ministeriu.

“Dados ne’ebe ami simu total benefisiario iha 31.517 ne’e kompostu husi nivel eskolar ensinu baziku, sekundariu jeral, no tekniku vokasional,” nia informa iha MEJD.

Nia dehan, estudante benefisiariu hirak ne’e bazeia ba mellor kualifikasaun iha ezame final nian tinan akademiku 2022, no estudante bolsa meritu sira ne’e governu valoriza nia sira matenek ho subsidiu iha kategoria tolu, nivel nasional, municipal, no ba pasagem klase ensinu baziku sira ne’ebe mak hetan melhor kualifikasaun.

Enkuantu nia dehan, estudante sira ne’ebe naran tama iha lista bolsa meritu ne’e mai husi eskola la’os ministeriu mak kria rasik lista tanba ne’e dadau ne’e ministeriu forma ona ekipa ida atu tun direta ba halo verifikasaun depois mak bele transferensia osan ba nefesisiariu sira nia konta bankaria.