MEJD Bandu Rekrutamentu Profesór Voluntáriu Iha Eskola Públiku

Ministériu Edukasaun Juventude no Desportu (MEJD) hasai ona sirkulár hodi bandu eskola públiku sira iha territóriu laran labele halo rekrutamentu ba profesór voluntáriu.

Diretór Jerál Edukasaun no Ensinu (DGEE) iha MEJD, Luis Manuel da Costa Fernandes, dehan ministerio hasai ona sirkulár ho númeru 19/DGEE-MEJD/1/2023 hodi informa ba Diretór Edukasaun Munisipál, no Superientendente no Diretór eskola públiku sira hahú husi ensinu báziku to’o sekundáriu jerál no tékniku vokasionál labele halo ona rekrutamentu ba profesór voluntáriu.

“Sirkulár ne’e ita bandu ona rekrutamentu profesór ba eskola públiku sira tanba ita konsentra ona ba prosesu kontratu profesór voluntáriu ne’ebé mak ita rejistu ona,” nia hatete.

Tanba ne’e bazeia ba sirkulár ne’e MEJD sei la simu tan rekrutamentu profesór voluntáriu foun husi parte ne’ebé de’it tanba ne’e husu eskola hotu atu kumpri orientasaun refere.

“Ba konsellu diretivu eskola ne’ebé de’it mak la kumpri orientasaun ne’e hodi hatama nafatin ema sai profesór kontratadu, sira mak sei responsabilidade ba ema nia direitu tomak nune’e mós ita sei fó prosesu disiplinár,” DGEE Fernandes informa.

Entretantu, Prezidente Komisaun G Trata Asuntu Edukasaun no Kultura iha Parlamentu Nasional, Deputado António Verdial dehan, desizaun ne’ebé mak MEJD foti, di’ak atu nune’e bele rezolve lai profesór voluntáriu ne’ebé rejistu ona kuaze na’in 2.111 mak oras ne’e hanorin hela iha eskola públiku iha territoriu laran.

“Maibé atu dehan de’it katak maské governu hapara ona labele rekruta tan profesór voluntáriu, maibé realidade iha eskola balun nafatin menus profesór tanba ne’e hakarak ka la kohi depois responde tiha profesór voluntáriu ne’ebé rejistu ona tenke halo fali rekrutamentu,” nia dehan.

Tanba ne’e nia dehan, eskola públiku barak ne’ebé mak sira vizita ne’e sempre menus profesór tanba kada tinan estudante sempre aumenta, tanba ne’e eskola presiza rekruta profesór voluntáriu, la rekruta estudante mak sai vítima.