Sexta, Março 01, 2024
Total visitors: 766366

Eskola 10 iha rai laran kompostu husi pré-eskolar to’o sekundária mak hetan estragus husi dezastre naturais ne’ebé foin lalais akontese iha Timor-Leste.

 

Eskola 10 iha rai laran kompostu husi pré-eskolar to’o sekundária mak hetan estragus husi dezastre naturais ne’ebé foin lalais akontese iha Timor-Leste.

Prezidente Autóridade Protesaun Sivíl (APC), Ismaiel Babo, dehan dezastre naturais ne’ebé foin akontese iha fulan dezembru mai to’o janeiru ne’e uma ne’ebé afetadu hamutuk 360 resin.

“Husi uma 360 resin ne’e iha eskola 10 mak hetan estragus, seluk uma privadu de’it iha Timor laran tomak,” nia informa iha knaar fatin Kaikoli.

Nia dehan, husi eskola 10 ne’ebé hetan estragus, oras ne’e dadaun ekipa husi Ministériu Edukasaun Juventude no Desportu (MEJD) kontatu ona katak sira hadia ona no estudante sira hahú ona prosesu aprendisajen.

Maibé iha eskola ida ka rua hanesan, ida iha Hera ne’ebe oras ne’e dadaun prosesu aprendisajen paradu provizóriu no Ermera nian ne’e mós hanesan tanba seidauk hadia hotu.

Nia dehan, dezastre naturais ne’ebé akontese ne’e kompostu husi anin sobu uma, rai monu, no balun ahi-han.

Enkuantu nia dehan, vítima husi uma privadu sira-ne’e dadaun iha hela sentru evakuasaun sira ne’ebé mak governu kria iha munisípiu no kona-ba apoiu emerjénsia ba vítima sira halo ona maibé seidauk hotu.

“Kona-ba apoiu rekuperasaun ba uma privadu sira seidauk tanba sei halo fali prosesu identifikasaun hodi hatene ida ne’ebé mak estragus totál no normál,” Prezidente APC Babo dehan.

Entretantu Diretór Jerál MEJD, Antoninho Pires, dehan eskola hirak ne’ebé mak hetan estragus husi dezastre naturais ne’e ekipa tuun direta hodi hadia ona.

“Iha eskola 8 mak hadia ona no estudante profesór sira hahú ona prosesu aprendisajen tinan letivu 2023 nian no eskola 2 mak seidauk bele hadia tanba iha área risku tebes ba dezastre hanesan iha Hera no iha Ermera nian,” GD MEJD Pires informa.

Tanba ne’e nia dehan, eskola rua ne’e deside ona paradu provizóriu lai depois parte eskola no governu hodi bele rezolve fatin nune’e sira bele realiza prosesu aprendisajen.