- Publika iha: 06 Janeiro 2023
Universidade Nasional Timor-Leste (UNTL) kria Fakuldade Arte no Turismu hodi halo promosaun ba arte no peskiza kona-ba kultura iha territóriu nasionál.
Reitór UNTL, Joao Soares Martins, dehan fakuldade foun ne'e ho intensaun atu estudante sira bele halo peskiza klean liutan ba kultura nune'e bele hasa'e sira-nia koñesimentu di’ak hodi promove kultura iha Timor-Leste.
Nia dehan, UNTL iha responsabilidade boot hodi salvaguarda tais-Timor ne’ebé mak hetan ona rekoñesimentu husi UNESCO.
"Tanba ne'e ita kria tan fakuldade arte no turismu nune'e bele promove siénsia no peskiza iha área kultura no arte, ho intensaun hakarak estudante sira bele halo estudu inklui hakarak halo mós estudu espesífiku kona-ba karateristika kultura Timor nian husi Bobonaru to'o Lospalos no Oecusse," Reitor UNTL Martins hatete.
Tanba ne'e, nia husu ba oitavu governu konstituisional liuhusi ministériu relevante atu fó apoiu fasilidade no ekipamentu nune'e bele fasilita peskiza ida ne'e, nune'e bele hasa'e koñesimentu joven sira-nian hodi koñese valór husi tais rasik.
“Nune’e ita bele fó oportunidade ba joven sira atu estuda no peskiza hodi koñese klean liu ita-nia tais nu’udar patrimóniu estadu nian," nia dehan.
Nune'e mós husu responsabilidade jerasaun foun sira-nian atu labele moe promove tais nu‘udar identidade Timoroan nian.
Entretantu, Ministru Ensinu Superiór, Siénsia no Kultura (MESSK), Longuinhos dos Santos dehan, reitór sira iha instituisaun ensinu superiór públiku no privadu atu apoia prosesu salvaguarda tais nu’udar patrimóniu kulturál Timor-Leste nian.
“Ha’u apelu ba magnífiku reitór sira iha instituisaun ensinu superiór sira bele mós fó apoiu ba prosesu salvaguarda Tais, liu-liu halo servisu akadémiku sira, nune'e mós atividade estrakurrikulár se di’ak liu kria fakuldade ketak hanesan UNTL nian," nia hatete.
Tanba ne'e governu prontu apoiu UNTL hodi halo peskiza espesífiku ba kultura no identidade Timor nian.
“Promove tais, ita prezerva mós identidade kulturál ita-nian, hasa’e rendimentu familiár husi soru tais," MESSK Santos dehan.
Tanba ne'e nia dehan, patrimóniu kulturál ne'e presiza urjente atu salvaguarda sai hanesan pasu pozitivu ida hodi aforsa identidade kulturál.