Quinta, Dezembro 08, 2022
Total visitors: 692025

Fundu Dezenvolvimentu Kapitál Humanu (FDCH) aloka ona osan ho montante $270,000 hodi fasilita bolseiru Timoroan na’in neen nulu resin neen (66) hodi fila ba kontinua sira nia estudu iha China.

Fundu Dezenvolvimentu Kapitál Humanu (FDCH) aloka ona osan ho montante $270,000 hodi fasilita bolseiru Timoroan na’in neen nulu resin neen (66) hodi fila ba kontinua sira nia estudu iha China.

Diretór Ezekutivu FDCH, Cristovão dos Reis, dehan bolseiru na’in 66 ne'e fila mai Timor-Leste, iha momentu ne’ebá enfrenta situasaun pandemia Covid-19 ne'e to'o agora seidauk fila, tanba osan hodi selu tiket no kuarentena la iha.

"Ita oferese ona osan ho montante $270,000 hodi fasilita prosesu bolseiru 66 ne'e fila bá China hodi hala'o estudu," nia dehan.

Nia hatutan FDCH realiza ona enkontru ho reprezentante bolseiru ne’ebé hetan bolsa estudu husi Governu China, hodi ko’alia kona-ba prosesu lori fila fali sira ba kontinua sira-nia estudu iha China.

"Prosesu hotu ita finaliza ona, semana oin bolseiru hirak ne'e bele arranka ona ba China, tanba ne'e husu sira tenke mai kompleta dokumentu, nune'e bele fila bá China," Diretór Reis afirma.

Nia dehan, bolseiru sira mai Timor-Leste iha momentu ne'ebá, governu Timor-Leste koopera ho governu Nova-Zelándia hodi fasilita sira fila mai Timor-Leste.

Iha parte seluk, bolseiru Maria Ximenes hateten, sira fila mai Timor-Leste iha tinan 2020 ne'e to'o agora(2022 sira seidauk fila tanba sira la iha osan hodi sosa tiket aviaun nune'e selu kuarentena.

"Maibé agradese tanba governu liuhusi FDCH bele apoiu ona ami-nia prosesu hotu hodi fila ba kuntinua ami-nia estudu," nia dehan.

Nia salienta, sira-nia eskola governu China nafatin selu no alojamentu, maibé osan ba tiket aviaun no kuarantena mak tenke responsabiliza rasik, tanba ne'e mak to'o ohin loron sira seidauk fila.

Nia dehan, prosesu aprendisajen iha universidade sira ne'ebé sira eskola ba prosesu aprendisajen la'o normál ona iha tinan 2021 no sira durante ne'e tuir aula onlne de’it.

"Maibé husi eskola ezije tenke prezensa iha ona eskola, tanba ne'e mak durante ne'e ami sempre eziji governu hodi tulun ami bele fila ba hala'o estudu, nune’e momentu ne'e lori bolseiru hotu nia naran hato'o agradese ba governu Timor-Leste nian tulun," Bolseira Ximenes agradese.