Quinta, Dezembro 08, 2022
Total visitors: 692025

Ministériu Ensinu Superiór, Siénsia no Kultura (MESSK) husu profesór sira hahú husi ensinu báziku to'o ensinu superiór tenke asegura edukasaun ho kualidade liuhusi prepara planu-aula tuir kurríkulu nasionál.

Ministru MESSK, Longuinhos dos Santos, dehan atu garante kualidade edukasaun iha Timor-Leste hodi prepara nasaun nia futuru ne’e responsabilidade iha profesór sira-nia liman.

Ministru MESSK, Longuinhos dos Santos, dehan atu garante kualidade edukasaun iha Timor-Leste hodi prepara nasaun nia futuru ne’e responsabilidade iha profesór sira-nia liman, hodi kontribui ba dezenvolvimentu edukasaun iha rai laran.

“Tanba ne’e ita husu profesór sira tenke asegura kualidade edukasaun iha Timor-Leste no presiza dezenvolve liután,” Ministru MESSK Santos dehan.

Nia dehan, atu garante kualidade edukasaun ne’e mak prosesu aprendisagem iha eskola tenke la’o tuir kurikulun ne’e mak iha ona no sai hanesan mata dalan hodi transforma siensia ba estudante sira.

“Maibe ita fiar katak profesór sira nafatin asegura kualidade edukasaun hodi prepara futuru nasaun nian ne’ebé mak iha matenek kona-ba siensia, nune’e mos moral hodi respeita ema seluk,” nia dehan.

Ministro Santos hatutan, Timor-Leste bele hala’o objetivu sira husi dezenvolvimentu sustentável mak importante tebes, tan ne’e husu ba profesór sira tenke nafatin asegura edukasaun ho kualidade ba labarik no foinsa’e sira hotu nia futuru.

Iha parte seluk Prezidente Komisaun G Trata Asuntu Edukasaun iha Parlamentu Nasional Deputado António Verdial dehan, durante ne’e profesór sira-nia kuntribuisaun maka’as tebes hodi hadia kualidade edukasaun tuir sira-nia matenek ne’ebé mak sira iha.

Nia dehan, kona-ba transformasaun siénsia ba estudante sira ne’e 100% tuir kurríkulu nasionál ne’ebé mak governu implementa ona hahú husi ensinu báziku to’o ensinu superiór, atu hadia nia kualidade di’ak liután ne’e responsabilidade governu nian.

“Governu tenke kompleta ekipamentu prátika ba eskola tanba teoria de’it ne’e susar tebes, atu hadi’ak kualidade di’ak liután presiza mós ekipamentu prátika la’ós teoria de’it,” Prezidente Komisaun G Verdial dehan.

Nia dehan, formasaun ba profesór sira mós importante, hodi forma di’ak liután sira-nia kapasidade no kualifikasaun ba iha prosesu ensinu nian.

“Sai profesór hanesan oportunidade ida atu kontribui hodi muda ita-nia nasaun nia futuru liuhosi formasaun ba ita-nia rekursu umanu sira,” nia salienta.

Tanba ne’e nia dehan, governu iha misaun universal atu kualifika sistema nasionál ensinu nian, liu-liu pre-eskolár, primáriu no sekundáriu to’o universidade, atu bele halo ida ne’e sai efikaz liu tan, maka liuhusi formasaun inisial no kontinua ba profesór sira.