- Publika iha: 11 Outubro 2022
Eskola Sekundária Tékniku Vokasionál (ESTV) Nicolau Lobato Soibada, Munisipiu Manatuto, enfrenta problema falta fasilidade eskolár inklui kuadru hakerek, livru, kadera-meza ba profesór sira, no armáriu hodi rai livru.
Kordenadór Asuntu Estudantíl ESTV Nicolaus Lobato Soibada, Clementino da Conceição Amaral dehan sira nia eskola iha saladeaula neen (6) kompleta ona no kartera eskolár maibé fasilidade seluk ne'ebé nesesita tebes hodi hanorin estudade sira iha eskola sei menus.
"Ita falta fasilidade eskolár hanesan, livru, kadera-meza ba profesór sira, kuadru hakerek no armáriu hodi rai livru," Kordenadór Eskola Amaral dehan via WhatsApp.
Nia dehan, livru ne'ebe mak la iha hanesan, manual ba profesor sira, livru dalen Tetun, relijiaun, malaiu, marketing, Comunicar com Inglés, Economia Método Quantitativo.
"Livru hirak ne'e ami sei menus, no durante ne'e, ami hanorin estudante utiliza livru ne'ebé mak ami rasik halo no rezumu," nia salienta.
Enakuantu kona-ba kadera-meza ba profesór mós sei menus liu, armáriu rai livru mós la iha no kuandru hakerek mós la iha.
Entretantu, Diretór Jerál (DG) Ministériu Edukasaun Juventude no Desportu (MEJD), Antoninho Pires dehan, dadaun ne'e governu kompleta uluk meza no kadera ba eskola sira ne'ebé identifika ona katak falta kadera no meza ba estudante sira.
"Kona-ba fasilidade seluk ne'ebé mak sei falta iha eskola hanesan, livru no kuadru lori hakerek ne'ebé dadaun ne'e ita seidauk bele kompleta tanba seidauk identifika," DG MEJD Pires dehan.
DG dehan, kona-ba livru, antes ne'e MEJD halo ona distribuisaun iha momentu situasaun Covid-19 ne'e ba estudante sira hodi estuda de’it iha uma.
"Ba eskola ne'ebé mak sei falta livru no manual ba estudante no profesór sira, ne'e ekipa husi ministériu presiza halo identifikasaun, nune'e bele distribui fali llivru hodi kompleta tiha," nia salienta.
Tanba ne'e, iha tempu badak ekipa sei ba terrenu hodi halo identifikasaun ba eskola ne'ebé falta fasilidade eskolár, nune'e, hatene tiha dadus loloos mak governu bele prepara fali fasilidade sira hodi distribui ba eskola sira.