MEJD Halo Instalasaun Linha Internet Ba Eskola Munisipiu Tolu

Ministeriu Edukasaun Juventude no Desportu (MEJD) halo ona instalasaun linha internet ba eskola iha munisipiu tolu Dili, Bobonaru, no Baucau, hodi fasilita estudante sira asesu ba internet iha tempu eskola.

Diretur Geral MEJD, Antoninho Pires, dehan instalasaun linha internet ba eskola iha munisipiu tolu ne’e hanesan projetu pilotu, bainhira rezultadu internet ne’e la’o diak mak sei instala tan ba eskola iha munisipiu seluk.

“Linha Internet ne’e importante tebes hodi instala iha eskola, nune’e bele fasilita estudante sira, bainhira halo trabalho nune’e labele husu husu hela deit osan ba inan aman hodi sosa pulsa asesu ba Google,” DG MEJD Pires dehan.

Nia dehan, munisipiu tolu ne’ebe mak halo ona instalasaun ba linha internet ne’e eskola 145 kompostu husi Dili, Bobonaru, no Baucau.

“Internet ne’ebe ita instala ne’e hahu husi eskola ensinu baziku to’o sekundaria jeral no tekniku vokasional, iha ne’eba iha kode ne’ebe mak estudante sira utiliza hodi asesu laos deit ba Google no aplikasaun seluk labele," nia hatete.

Tanba ne’e, MEJD garante katak sei la iha problema seluk ne’ebe mak mosu banhira estudante sira asesu internet iha eskola,” DG Pires informa.

“Linha Internet ne’e MEJD halo kontratu ho preza telekomunikasaun Telemor no Telkomcel mak halo instalasaun,” nia dehan.

Enkauntu nia dehan, linha internet ne'e laos estudante deit mak sai benefisiariu maibe ba mos professores sira iha eskola.

Entretantu, Diretor Edukasaun Munisipiu Baucau, Agusto Hornai Ximenes, informa katak, operador rua daudaun ne’e finaliza ona servisu instalasaun linha internet ba eskola sira iha terenu no iha Baucau eskola ne'ebe mak sai benefisiariu hamutuk 13 eskola.

“Hau atu dehan, deit katak linha internet ne’e laos instala ba eskola hotu iha Baucau maibe eskola sira ne’ebe mak tama ba iha projetu pilotu ida ne’e mak hamutuk 13,” Diretor Ximenes dehan.

Enkuantu nia dehan, eskola 13 ne’e kompostu husi ensinu baziku 5 no sekundaria geral no tekniku vokasional 8 iha munisipiu Baucau no linha internet ne’e tuir informasaun katak diak tebes hodi fasilita estudante no professores sira iha eskola.