Professor Idade Reformadu Nain 2.060 Aktivu Hela Hanorin Iha Eskola

Professor ho idade reformadu hamutuk nain 2.060 kuntinua aktivu hodi hanorin estudante sira iha eskola, tanba lei la obriga sira atu reforma nune’e mos Minsiteriu Eduaksaun Juventude no Desportu (MEJD) sei presija nafatin sira nia kuntribuisaun hodi dezenvolve edukasaun iha Timor.

Vise Ministru MEJD, Antonio Guterres, dehan professor idade reformadu nain 2.060 refere dadaun ne’e balun hanesan professor bai-bain, balun hanesan kordenador eskola nune’e mos sai hanesan professor hodi hanorin estudante sira.

“Sira nia saude fizikamente sei diak hela, no sira prontu hela hanorin iha eskola. Bainhira sira hakarak reforma mak sira rasik sei halo karta reforma mai ministeriu,” nia dehan.

Nia hatete, MEJD labele obriga sira atu reforma, tanba lei funsaun publika mak la obriga professor sira, katak idade 60 anos bele reforma ona maibe saude no fizikamente sei saudavel bele kuntinua hala’o knar hanesan professor.

“Ita mos presija hela sira nia kutribuisaun hodi transforma siensia ba estudante iha eskola, tanba professor foin sa’e sira la dun iha mentalidade no konhesimentu diak hanesan professor antigun sira ne’e,” VM Guterres informa.

Tanba ne’e governu fo nafatin oportunidade ba professor reformadu nain 2.060 ne’ebe aktivu iha eskola to’o tempu sira hakarak reforma hodi intrega ba professor foin sa’e sira.

Enkauntu nia dehan, total professor kontratadu ne’ebe mak ministeriu hasa’e ona sira nia estatus ba permanente iha tinan 2022 ho total nain 2.111 no sira mak sei akompanha professor idade reforma sira.

Entretantu, Kordenador Ensinu Baziku Filial (EBF), Rama-Hana Jose da Costa, dehan husi EBF Rama-Hana iha professor nain 5 mak hanorin durante ne’e, nain 3 kontratadu nain 2 mak permanente maibe idade reforma hotu ona.

“Idade reforma ne’e mak hau rasik, hanesan kordenador eskola nune’e mos professor, ho hau nia professor ida. Ami hatama ona karta reforma ba gabinete Ministeriu Edukasaun Juventude no Desportu (MEJD) maibe seidauk responde tanba ne’e mak ami kuntinua ativu iha eskola,” nia dehan.

Nia dehan, bainhira sira nain 2 reforma MEJD tenke kompleta kedan ho professor ba eskola refere nune’e estudante sira labele iha difikuldade hodi asesu ba materia.