- Publika iha: 22 Setembro 2022
Diretor Geral Ministeriu Edukasaun Juventude no Desporto (MEJD) Antoninho Pires hatete, eskola internasional sira ne'ebe eziste obrigatoriu tenke hanorin materia sira tuir nesesidade Timor-Leste nian, tanba maioria Timoroan mak eskola iha ne'eba, nune'e sira bele hatene konaba identidade no kultura Timor nian.
"Obrigatoriu eskola internasional sira tenke hanorin materia hirak ne'e tanba eskola refere maioria Timoroan mak eskola iha ne'eba laos malae nian oan sira," DG MEJD Pires dehan.
Tanba ne'e se bainhira eskola internasional sira mak la iha materia nesesidade hirak ne'e mak Timoroan ne'ebe mak eskola iha ne'eba sei la hatene konaba historia no kultura Timor nian.
"Eskola mak internasional maibe labarik sira eskola iha ne'eba mesak Timoroan deit, tanba ne'e tenke hanorin materia ne'ebe mak Timor presija hanesan lian ofisial portugues tetun, historia tanba nudar kultura identidade Timor nian nune'e mos edukasaun sivika," nia informa.
Tanba ne'e nia dehan, husi eskola internasional 9 ne'ebe mak eziste iha Timor iha eskola rua hanesan Rui Cinatti no Dili Internasional School mak hanorin ona materia nesesidade hirak ne'ebe mak obrigatoriu atu hanorin iha eskola.
Entretantu, Prezidente Komisaun G Trata Asuntu Edukasaun iha Parlamentu Nasional, Deputado Antonio Verdial dehan, materia hirak ne'ebe mak importansia ne'e hodi hanorin iha eskola internasional sira ne'e diak liu MEJD tau hanesan rekejitu banhira hetan rekonhesimentu husi Estadu Timor-Leste, nune'e sira bele kumpri se kaolia deit nune'e difisil tebes atu implementa.
"Materia hanesan, lian ofisial portugues, tetun, historia no edukasaun sivika ne'e diak liu hola parte iha sira nia kurikulum proprio iha eskola internasional sira nune'e bele hanorin ba Timoroan ne'ebe mak hala'o estudu iha eskola internasional sira," Prezidente Komisaun G Verdial dehan.
Tanba ne'e nia dehan se la liu husi kurikulu susar ituan atu implementa, tanba ne'e tenke inklina iha kurikulu nune'e bele kesi metin.
Alende ne'e nia dehan, se la liu husi kurikulu, entaun tenke sai rekizitu ne'ebe eskola internasional sira tenke kumpre no sira seidauk bele kumpre rekezitu hirak nee maka sei la hetan akreditasaun.