- Publika iha: 21 Setembro 2022
Ministeriu Edukasaun Juventude no Desporto (MEJD) durante ne'e estabele ona eskola Eskola Centro Aprendisagem Formasaun Eskolar (CAFE) hamutuk 16 kompostu husi eskola ensino pre-eskolar to'o ensinu sekundariu jeral iha Timor-Leste laran tomak.
Ministro MEJDm Armindo Maia, dehan eskola CAFE estabelese ho objetivu tolu (3) inklui, hadia kualidade iha eskola publika, utiliza lian portugues hodi hanorin disiplina hotu iha eskola, nune'e mos fo oportunidade ba finalista universidade sira bele hanorin.
"Ho objetivu tolu ne'e mak motiva ita hodi estabele ona eskola Centro Aprendisagem Formasaun Eskolar (CAFE) hamutuk 16 iha teritoriu laran tomak hodi fo oportunidade ba estudante sira hodi aprende siensia ne'ebe mak diak, nune'e mos lian portugues," Ministro Maia dehan.
Ministro haktuir katak dadaun ne'e MEJD konstrui tan eskola CAFE 3 iha munisipiu Liquica, Ainaru no Covalima ho total orsamento $3 milhoens.
Enkuantu total estudante ne'e mak oras ne'e aktivu hela iha eskola CAFE sira iha rai laran, hamutuk nain 10.645 ho total professor nain 541 kompostu husi professor Portugal nain 341 no Timoroan nain 200.
"Plano prioridade ba tinan 2023 nian ita sei konstrui tan eskola CAFE hamutuk 5, iha Manufahi, Manatuto, Lospalos, no Dili," nia informa.
Entretantu, Kordenador Rede Edukasaun Timor-Leste Coalition for Education (TLCE), Jose Monterio, dehan eskola CAFE kuntribui tebes ba kualidade ensinu iha Timor-Leste.
"Tanba ita hare kada tinan, eskola CAFE mak sempre hetan valor ne'ebe mak bo'ot iha rezultadu ezame nasional tanba ne'e ita husu bele dezenvolve liu tan," Kordenador TLCE Monteiro informa.
Nia sujere mos karik bele kria to'o politika ida oinsa bele bele muda sistema hanorin iha eskola publiku sira seluk nune'ebe bele hanesan eskola CAFE.
"Ita hakarak mos eskola publiku sira seluk hanesan ho CAFE tanba povu nian oan barak mak eskola iha ne'eba laos eskola CAFE deit," nia sujere iha knar fatin Kaikoli.
Tanba ne'e nia dehan, se eskola publiku sira mak muda sistema ensina hanesan eskola CAFE nune'e mos kada eskola inklina ho professor Portugal balun ne'e kapas tebes no kuntribui tebes ba dezenvolvimentu kualidade iha eskola publiku sira.