- Publika iha: 10 Maio 2022
Ministerio Edukasaun Juventude no Desportu (MEJD) aloka orsamento hamutuk $9 Milhoens hodi apoiu estudante sira iha eskola publiku no privado ne'ebe mak hetan valor bo'ot.
Ministro MEJD, Armindo Maia hateten orsamento $9 Milhoens refere hanesan subsidio ida ba estudante sira ne'ebe mak valor bo'ot hanesan okupa iha primeiro lugar to'o terseiro lugar iha eskola.
"Apoiu ne'e hanesan apresiasaun ida ba estudante sira ne'e nune'e sira nafatin iha vontade estuda nafatin nune'e mos hodi fanun estudante sira ne'ebe mak baruk ten estuda nune'e mos sira bele hetan valor ne'ebe diak," Ministro MEJD Maia hateten.
Nia dehan, programa ne'e implementa ba eskola publiku 70% no privado 20% iha teritorio laran hahu husi ensinu baziku to'o sekundario.
"Programa ne'e ita implementa uluk iha munisipio Dili no Atauru hanesan pilotu depois mak ita kuntinua ba munisipio seluk iha teritorio laran," nia hateten.
Nia dehan, kria subsidio ba estudante ne'ebe valor diak, hodi halo sira bele iha kuriozidade aprende liu tan iha eskola nune'e bele influensia estudante seluk bele estuda.
"Ami identifika ona kuaze estudante 55% husi eskola publiku no privado mak sai benefisiariu ba osan $9 Milhoens ne'e, no kada estudante hetan nia montante la hanesan tanba bazeia ba valor," nia informa.
Entretanto, Kordenador Rede Edukasaun Timor-Leste Coalition for Education (TLCE) Jose Monterio hateten TLCE sempre apoiu programa governo nian ne'ebe mak nesesidade duni hodi ajuda estudante sira bele haka'as an estuda nune'e bele halo mudansa ba sira nia valor.
"Programa apoiu subsidio ba estudante ne'ebe valor bo'ot ne'e diak nune'e bele enkoraza sira estuda nafatin, maibe ita husu atu bele kontrola nune'e osan ne'e garante katak to'o duni estudante nia liman labele para fali iha professor sira," TLCE monterio hateten.