- Publika iha: 26 Fevereiro 2013
Materia tolu ne’ebe Ministeriu Edukasaun aumenta ba iha kurikulum Ensino Sekundariu, to’o agora seidauk bele hanorin ba estudante sira tanba professor atu hanorin materia hirak ne’e laiha. “Agora dadauk tama ona iha segundu ano prosesu aprendizajen la la’o tanba iha klase profesor atu hanorin materia temas literature,tekniku multi media,no geologia ba segundu ano laiha, e livru mos to’o agora seidauk haruka mai iha eskola,” hateten Diretor Eskola Sekundariu 04 de Setembru, Alberto da Costa Braz,iha Balidi ,(06/02).
Diretor Braz hatutan, iha momentu implementa kurikulu foun tolu ne’e ministeriu la rekruta profesor atu hanorin materia hirak ne’e.
Diretor ne’e dehan, atu estudante sira labele sai vitima ba materia hirak ne’e, parte eskola buka dalan profesor sira ne’ebe mak hanorin lisaun fisika,biologia no balun iha konesmentu kona ba komputador ajuda hanorin fali materia tolu ne’e.
Enkuantu Estudante Roberto do Nascimento, rekonese katak,materia tolu ne’e to’o oras ne’e seidauk iha profesor atu hanorin sira.
“Ami nia profesor ba materia tolu ne’e mak seidauk iha mak ami sidauk hetan,” dehan Estudante husi 04 de Setembru ne’e.
Tanba ne’e nia sujere ba Ministeriu da edukasaun atu buka profesor ba materia tolu ne’e atu hanorin sira.
Iha parte seluk,Prezidenti Komisaun F, Deputadu Virgilio Hornai katak, agora dadauk Ministeriu Edukasaun kontinua fo formasaun ba profesor sira atu hanorin iha eskola sira.
“Hau hanoin formasaun ne’e sei lao nafatin atu halo formaasaun ba profesor sira atu nune’e sir abele halao sira nia knar espesialidade ida-idak ninian,”Hornai informa.
Entretantu bainhira TDW koko konfirma asuntu ne’e ba iha Ministru Edukasaun iha Parlamentu Nasioinal maibe Ministru Bendito Freitas rezeita hodi fo informasaun kona ba asuntu ne’e.